تیل اورگیس کی موثر پالیسی کیلئے کمیٹی تشکیل

وزیراعظم شہباز شریف نے نائب وزیراعظم اسحا ق ڈار کی زیر قیادت ایک کمیٹی تشکیل دی ہے تاکہ صارفین سے مشاورت کے بعد ملک میں تیل اور گیس کیلئے موثر پالیسی کیلئے ایک لائحہ عمل مرتب کیا جا سکے۔

شہباز شریف نے آج اسلام آباد میں گیس اور تیل کے ذخائر کی دریافت کے ایک وفد سے ملاقات میں کہا کہ مقامی تیل اور گیس کے ذخائر کی دریافت حکومت کی ترجیح میں شامل ہے۔

انہوں نے پٹرولیم اور گیس ایکسپلوریشن کمپنیوں کو سمندر کے اندر کے ذخائر دریافت کرنے کی دعوت دی انہوں نے کہا کہ مقامی ذخائر کی پیداوار سے ملک کے قیمتی زرمبادلہ میں بچت ہو گی اور عام آدمی کو سستا تیل اور گیس ملے گا۔وزیراعظم نے متعلقہ حکام کو ہدایت کی کہ وہ اس شعبے کو درپیش مسائل ترجیحی بنیادوں پر حل کریں۔اس موقع پر پٹرولیم اور گیس ایکسپلوریشن اینڈ پروڈکشن کمپنیوں نے آئندہ تین سال میں ملک میں پانچ ارب کی سرمایہ کاری کا اعلان کیا۔اِس عرصے کے دوران پٹرول اور گیس کی تلاش کیلئے دو سو چالیس مقامات کی کھدائی کی جائے گی۔