وزیر داخلہ کا منشیات فروشوں کے خلاف کریک ڈاؤن

راولپنڈی : وزیر داخلہ محسن نقوی نے منشیات فروشوں کے خلاف بڑی کارروائی شروع کرنے کی ہدایت کی ہے اور اس مقصد کیلئے جامع منصوبہ طلب کیا ہے۔

راولپنڈی میں انسداد منشیات فورس کے ہیڈ کوارٹر میں اجلاس کی صدارت کرتے ہوئے انہوں نے منشیات کی آن لائن فروخت کی روک تھام کیلئے بھی جامع منصوبہ تیار کرنے کی ہدایت کی۔محسن نقوی نے کہا کہ منشیات اور اس کے نشہ نے متعدد خاندانوں کو تباہ کردیا ہے ۔اس لئے منشیات کے بڑھتے ہوئے استعمال کو ختم کرنے کیلئے فوری اور کثیرجہتی اقدامات کی ضرورت ہے۔

اجلاس کے دوران وزیر داخلہ کو اے این ایف کی کارکردگی طریقہ کار اور کارروائیوں کے بارے میں آگاہ کیا گیا۔انہوں نے محدود وسائل کے باوجود ملک بھر میں انسداد منشیات فورس کی منشیات فروشوں کے خلاف کارکردگی کو سراہا۔وزیر داخلہ نے شہداء کی یادگار پر پھولوں کی چادر چڑھائی فاتحہ خوانی کی اور شہداء کی عظیم قربانیوں کو خراج عقیدت پیش کیا۔