نیپال،مٹی کا تودہ ٹکرانے سے 2 بسیں دریامیں جا گریں، 66 افراد لاپتہ

کھٹمنڈو: نیپال کے وسطی علاقے میں پہاڑ سے مٹی کا تودہ گرنے کے باعث سفر کرنے والی 2بسیں دریا میں جا گریں۔ حادثے کے نتیجے میں 66 افراد لا پتا ہو گئے ہیں۔

مٹی کا تودہ ٹکرانے سے دونوں بسیں دریائے ترشولی میں گر گئیں۔یہ واقعہ دار الحکومت کھٹمنڈو سے 100 کلو میٹر مغرب میںچتوان ڈسٹرکٹ میں پیش آیا۔ حکام نے بتایا کہ حادثے کا شکار ہونیوالی 1 بس میں 24 افراد جبکہ دوسری بس میں 42 افراد سوار تھے۔

غیر ملکی خبر رساں ادارے کے مطابق حکام نے مزید بتایا کہ بسیں دریا میں گرنے سے پہلے 3 مسافر محفوظ رہنے میں کامیاب ہو گئے، ان افرادکو ہسپتال میں علاج فراہم کیا جا رہا ہے۔

انہوں نے بتایا کہ لاپتا ہونیوالے افراد کی مجموعی تعداد فی الحال معلوم نہیں ہوسکی کیونکہ بسوں میں شاید کچھ سواریاں راستے سے بھی شامل ہو سکتی ہیں۔

نیپال کے وزیراعظم پشپا کمل دہل نے سوشل میڈیا ’’ایکس‘‘ پر اپنی ایک پوسٹ میں اس واقعے پر گہرے دکھ کا اظہار کیا۔ انہوں نے سرکاری حکام اور انتظامیہ کو مسافروں کی تلاش اور امدادی سہولیات فراہم کرنے کی ہدایات جاری کر دیں۔