ایران کی میزائل اور بحری طاقت کو نیست و نابود کر دیں گے، امریکی صدر کی دھمکی

واشنگٹن ڈی سی: امریکی صدر ڈونلڈ ٹرمپ نےایران پرحملے کی تصدیق کرتے ہوئے کہا کہ ایران کی میزائل اور بحری طاقت کو نیست و نابود کر دیں گے۔

غیر ملکی میڈیا رپورٹس کے مطابق امریکی صدر ڈونلڈٹرمپ نےاپنے بیان میں کہا ہے کہ  امریکا نے ایران کے خلاف کچھ دیر پہلے آپریشن شروع کر دیا ہے،ہمارا مقصد امریکی عوام کی سیکیورٹی یقینی بنانا ہے۔

امریکی صدر نے کہاکہ ایرانی رجیم کی جانب سے خطرے کو ختم کررہے ہیں،ایران کو کبھی ایٹمی ہتھیار حاصل کرنے نہیں دیں گے،ایران اپنےایٹمی پروگرام کو دوبارہ شروع کرنا چاہتا تھا،ایران لانگ رینج میزائل بنارہا ہےجو امریکا کیلئے خطرہ ہیں۔

ٹرمپ نے مزید کہا کہ امریکی فوج ایک جامع آپریشن میں مصروف ہے،ہم ان کے میزائل پروگرام کو نیست و نابود کرنے جارہے ہیں،ہم ایران کی نیوی کو بھی ختم کریں گے۔

ان کا کہنا تھا کہ ”ہمارا مقصد ایرانی حکومت کے خطرات کو ختم کر کے امریکی عوام کا دفاع کرنا ہے۔ ہم ان کے میزائلوں کو تباہ اور ان کی میزائل انڈسٹری کو مٹی میں ملا دیں گے۔ ہم ان کی بحریہ کو نیست و نابود کر دیں گے۔

انہوں نے مزید کہا کہ “ہم اس بات کو یقینی بنائیں گے کہ خطے میں ان کی دہشت گرد پراکیسیز اب مزید خطے یا دنیا کو عدم استحکام کا شکار نہ کر سکیں۔ ہم اس بات کو یقینی بنائیں گے کہ ایران ایٹمی ہتھیار حاصل نہ کر سکے۔“

ان کا کہنا تھا کہ ”یہ ایک بہت سادہ سا پیغام ہے: ان کے پاس کبھی ایٹمی ہتھیار نہیں ہوں گے۔ اس حکومت کو جلد معلوم ہو جائے گا کہ کسی کو بھی امریکی مسلح افواج کی طاقت اور عظمت کو چیلنج نہیں کرنا چاہیے۔