نائیجیریا : سکول کی عمارت گرنے سے طلبہ سمیت 22 افراد ہلاک

نائیجیریا کے ایک سکول کی عمارت گرنے سے 22 افراد ہلاک ہو گئے۔

تفصیلات کے مطابق نائیجیریا میں پلییٹو اسٹیٹ میں ایک سکول کی عمارت گر گئی جس کے نتیجے میں 16 طلبہ سمیت 22 افراد ہلاک جبکہ درجنوں افراد زخمی ہو گئے۔

غیر ملکی میڈیا کے مطابق حکام کا کہنا ہے کہ ملبے تلے 150 سے زائد افراد دبے ہوئے ہیں جن کو نکالنے کیلئے ریسکیو آپریشن کیا جا رہاہے۔ 132 بچوں کو ملبے کے نیچے سے نکال لیا گیا ہے جنہیں طبی امداد کیلئے ہسپتال منتقل کر دیا گیا ہے۔

حکام نے بتایا کہ ہلاک اور زخمی ہونے والوں میں زیادہ تعداد بچوں کی ہے جن کی عمریں 15 سال یا اس سے کم ہیں،حکام نے ہلاکتوں میں اضافے کا خدشہ بھی ظاہر کیا ہے۔

غیر ملکی خبر رساں ایجنسی کے مطابق نائیجیریا میں سکول کی گرنے والی عمارت کے ملبے سے بچوں اور دیگر پھنسے ہوئے افراد کی مدد کیلئے آوازیں بھی سنیں گئیں ہیں۔

ذرائع کا یہ بھی کہنا ہے کہ عمارت گرنے سے پہلے سکول میںبچوں کے امتحانات چل رہے تھے اور اسی دوران عمارت زمین بوس ہو گئی۔