بانی پی ٹی آئی کی 9 مئی کے 3 مقدمات میں گرفتاری کا امکان

بانی پی ٹی آئی عمران خان کے خلاف 9 مئی کے 3 مقدمات میں گرفتاری ڈالنے کے لیے پولیس اڈیالہ جیل کے باہر پہنچ گئی۔ 
پاکستان تحریک انصاف کے بانی عمران خان کو حال ہی میں عدالت نے عدت نکاح کیس سے بری کر دیا، مگر سابق وزیر اعظم عمران خان کی گرفتاریوں کا خطرہ ابھی ٹلا نہیں ہے۔ 
ذرائع کے مطابق آج عدالت کے فیصلہ آنے سے قبل عدالت کےباہر پولیس کی بھاری نفری پہنچ گئی۔ 
پی ٹی آئی کے وکیل نعیم حیدرپنجھوٹہ نے ٹویٹ کرتے ہوئے بتایا کہ عدالت کے باہر پولیس کی اضافی نفری نظر آرہی ہے۔ پی ٹی آئی کے رہنماؤں نے عمران خان کی مزید کسی کیس میں گرفتاری ڈالنے کی مزمت کی۔ 
ذرائع نے دعویٰ کیا کہ عدالت کی جانب سے عدت نکاح کیس میں ریلیف ملنے کے بعد پولیس نفری 9 مئی کے 3 مقدمات میں گرفتار کرنے کے لیے اڈیالہ جیل پہنچ گئی۔ 
دوسری جانب عمران خان کی اہلیہ بشریٰ بی بی کو بھی توشہ خانہ کیس میں گرفتار کیے جانے کا امکان ظاہر کیا جا رہا ہے۔ 
عمران خان پر القادر ٹرسٹ کیس سمیت 9 مئی کے مقدمات بھی درج ہیں، جن پر ابھی فیصلہ آنا باقی ہے۔ بانی پی ٹی آئی عمران خان پر عائد تمام مقدمات کے فیصلوں تک عمران خان جیل سے باہر نہیں آسکیں گے۔