تحریک انصاف پر پابندی کا حکومتی فیصلہ فاشزم کی مثال ہے، امیر جماعت اسلامی

امیر جماعت اسلامی حافظ نعیم الرحمٰن نے کہا ہے کہ تحریک انصاف پر پابندی کا حکومتی فیصلہ فاشزم کی مثال ہے۔ 

سوشل میڈیا پلیٹ فارم ایکس پر اپنے ٹویٹ میں امیر جماعت اسلامی نے حکومت کی جانب سے  پی ٹی  آئی پرپابندی کے فیصلے پر ردعمل دیتے ہوئے کہا ہے کہ فارم 47 پر بننے والی حکومت کا تحریک انصاف پر پابندی لگانے کا فیصلہ فاشزم/فسطائیت کی مثال ہے۔

حافظ نعیم الرحمٰن  نے اپنے ٹویٹ میں مزید لکھا ہے کہ جمہوری معاشروں میں ان فیصلوں کی کوئی گنجائش نہیں، اس ملک میں آئین بھی ہے اورعدالتیں بھی۔

دوسری طرف عوامی نیشنل پارٹی نے بھی تحریک انصاف پر پابندی کی مخالفت کردی۔ صرف آمرانہ سوچ پر یقین رکھنے والی جماعتیں ہی ایسے غاصبانہ فیصلے کرسکتی ہیں۔

سینیٹر ارباب عمر فاروق کاسی نے کہا کہ جمہوری دور میں سیاسی پارٹیوں پر پابندی کے فیصلے کی حمایت نہیں کی جاسکتی، سیاسی جماعتوں پر پابندی کے لئے متعلقہ فورمز موجود ہیں، سیاسی جماعتیں ایک دوسرے کی ٹانگیں کھینچنے کے بجائے جمہوری عمل کو مضبوط کریں۔

انہوں نے مزید کہا کہ جمہوری نظام کو ڈی ریل سے بچانے کی ذمہ داری حکومت سمیت تمام سیاسی جماعتوں کی ہے، ملک کے موجودہ بحران کا حل صرف سیاسی ہے، طاقت کے استعمال سے عدم استحکام بڑھے گا۔