مخصوص نشستوں کا معاملہ،الیکشن کمیشن کا سپریم کورٹ کے فیصلے پر عمل درآمد کرنے کا فیصلہ

مخصوص نشستوں کا معاملہ،الیکشن کمیشن نے سپریم کورٹ کے فیصلے پر عمل درآمد کرنے کا فیصلہ کر لیا۔

چیف الیکشن کمشنر سکندر سلطان راجہ کی زیر صدارت مخصوص نشستیں تحریک انصاف کو دینے کے حوالے سے اہم مشاورتی اجلاس جاری ہے۔

سپریم کورٹ کے فیصلے پر عملدرآمد سے متعلق آج الیکشن کمیشن کا دوسرا اجلاس ہورہا ہے، گزشتہ روز اجلاس بے نتیجہ ختم ہوگیا تھا۔

اجلاس میں پی ٹی آئی کو مخصوص نشستیں دینے سے متعلق غور کیا جارہا ہے، الیکشن کمیشن کی قانونی ٹیم آج بھی بریفنگ دے رہی ہے۔

الیکشن کمیشن کے اعلامیے میں کہا گیا کہ ادارے کے کسی فیصلے کی غلط تشریح نہیں کی۔الیکشن کمیشن کسی قسم کے دباؤ کو خاطر میں نہیں لائے گا بلکہ آئین اور قانون کے مطابق کارم کرتا رہے گا۔

ادارے پر الزام تراشی انتہائی نامناسب ہے، پی ٹی آئی اس کیس میں الیکشن کمیش، پشاور ہائی کورٹ اور سپریم کورٹ کہیں بھی پارٹی نہیں تھی۔سیاسی پارٹی کی چیف الیکشن کمشنر اور ارکان پر مسلسل تنقید قابل مذمت ہے۔

الیکشن کمیشن نے لیگل ٹیم کو ہدایات دی ہیں کہ فیصلے کے کسی پوائنٹ پر عملدرآمد میں رکاوٹ ہے تو نشاندہی کریں تاکہ مزید رہنمائی کے لیے سپریم کورٹ سے رجوع کیا جائے۔

واضح رہے کہ سپریم کورٹ نے پشاور ہائیکورٹ اور الیکشن کمیشن کا فیصلہ کالعدم قرار دیتے ہوئے مخصوص نشستیں پی ٹی آئی کو دینے کا حکم دیا تھا۔ سپریم کورٹ نے تحریکِ انصاف کو پارلیمنٹ اور صوبائی اسمبلیوں میں بطور جماعت بھی قرار دیا۔

دوسری جانب مخصوص نشستیں پاکستان تحریک انصاف (پی ٹی آئی) کو دینے کے معاملے پر مسلم لیگ ن نے نظرثانی درخواست بھی سپریم کورٹ میں دائر کی ہے۔