عالمی عدالت انصاف کا اجلاس دی ہیگ میں منعقد ہوا، جس میں عالمی عدالت نے کہا کہ اسرائیل مقبوضہ فلسطینی علاقوں میں شہریوں کے تحفظ کا پابند ہے، وہ فلسطینیوں کے مقبوضہ علاقوں کے وسائل غصب کر رہا ہے۔  

عالمی عدالت انصاف کو اسرائیل کے زیر قبضہ علاقوں پر رائے دینے کا حق حاصل ہے، عالمی عدالت انصاف نے کہا اسرائیل نے مقبوضہ علاقوں میں سنگین خلاف ورزیاں کیں۔ 

عالمی عدالت نے کہا بین الاقوامی معاہدوں کے تحت اسرائیل مقبوضہ علاقوں میں پانی اور غذائی امداد پہنچانے کا پابند ہے۔ 

آئی سی جے نے کہا کہ یہودی آباد کاروں کی جانب سے فلسطینیوں کی جائیدادوں پر قبضے سے اسرائیل نے بین الاقوامی قوانین کی خلاف ورزی کی۔ 

آئی سی جے نے کہا اسرائیل کی جانب سے مقبوضہ فلسطینی علاقوں کے شہریوں کو زبردستی بےدخل کرنا سنگین عمل ہے اور اسرائیل کا فلسطینی علاقوں پر جبری قبضہ کر کے اجارہ داری قائم کرنا جنیوا معاہدے کی خلاف ورزی ہے۔ 

عالمی عدالت انصاف نے کہا اسرائیل فلسطینیوں کے مقبوضہ علاقوں کے وسائل غصب کر رہا ہے، ہمیں ملنے والے دلائل کے مطابق اسرائیل مغربی کنارے پر زبردستی اپنا تسلط قائم کرنے کے منصوبے پر عمل پیرا ہے۔ 

عالمی عدالت، اسرائیل کے مغربی کنارے میں اپنے قوانین کے نفاذ سے متعلق دی گئی وجوہات سے قائل نہیں ہوئی، اسرائیل نے مقبوضہ بیت المقدس میں غاصبانہ انداز اپنایا ہوا ہے جیسے کہ یہ اس کا اپناعلاقہ ہے۔ 

آئی سی جے نے کہا اسرائیل کی پالیسیوں اور کارروائیوں نے فلسطینیوں کے لیے حق خود ارادیت کے حصول کو انتہائی دشوار کر دیا ہے۔ 

آئی سی جے نے کہا اسرائیل کا فلسطینیوں کے ساتھ برتاؤ  نسل پرستی اور امتیازی سلوک کے زمرے میں آتا ہے۔ 

عالمی عدالت نے کہا فلسطینیوں کے خلاف اسرائیل کی کارروائیاں انسداد نسل پرستی معاہدے کی خلاف ورزی ہے،  اسرائیل نے 2009 میں فلسطینیوں کے 11 ہزار سے زائد رہائشی یونٹس کو غیر قانونی قرار دے کر گرایا۔ 

عدالت سمجھتی ہے کہ قابض اسرائیلی حکومت فلسطینی قوم کو خود مختاری سے روک نہیں سکتی۔ 

عالمی عدالت نے کہا اسرائیل مقبوضہ فلسطینی علاقوں سے جلد از جلد اپنے قبضے کا خاتمہ کرے،یہودی بستیاں قائم کرنے کا مقصد مغربی کنارے میں اسرائیلی تسلط کو مزید فروغ دینا ہے۔ 

عدالت نے کہا اسرائیل فلسطینیوں کے علاقوں پر غیر قانونی طریقے سے موجود ہے، عدالت اسرائیل کی طرف سے 1967 کی حد بندی بشمول مشرقی بیت المقدس کی آبادیاتی تبدیلی کو تسلیم نہیں کرتی۔ 

بھارت میں صحافی برادری کے خلاف مقدمات درج کئے جا رہے ہیں۔

بین الاقوامی میڈیا کے مطابق مسلمانوں کے خلاف مظالم پر آواز اٹھانے پر صحافیوں کو درجنوں مقدمات کا سامنا ہے۔

پچھلے ہفتے اُتر پردیش میں ایک مسلمان کو مبینہ طور پر تشدد کا نشانہ بنایا گیا۔ ریاستی عہدیداروں نے واقعے کو دبانے کی کوشش کی۔ صحافیوں کو اِس ظالمانہ واقعے کے بارے میں لکھنے پر سخت نتائج بھگتنے کی دھمکی دی گئی۔

بین الاقوامی میڈیا کے مطابق صحافی برادری کو بھارت میں سخت ریاستی پابندیوں کا سامنا ہے، پولیس نے سوشل میڈیا پلیٹ فارم پر مسلمانوں کے حق میں آواز بلند کرنے پر دو مسلمان صحافیوں کے خلاف مقدمات درج کئے ہیں۔

لاہور: ترجمان دفتر خارجہ ممتاز زہرا بلوچ نے میڈیا بریفنگ میں کہا کہ دوسرے ممالک پاکستان کے داخلی معاملات پر تبصرے سے گریز کریں۔ انہوں نے کہا کہ پاکستان اپنے اندرونی مسائل کو خود حل کرنے کے قابل ہے اور کسی سیاسی جماعت پر پابندی اس کا اپنا داخلی معاملہ ہے۔

انہوں نے یہ بات پی ٹی آئی پر پابندی کے حوالے سے امریکہ کے ردعمل پر کہی۔ انہوں نے کہا کہ سپریم کورٹ کا فیصلہ پاکستان کے جوڈیشل سسٹم کی مضبوطی کا مظہر ہے۔

ممتاز زہرا بلوچ نے افغانستان میں دہشت گردی کے لیے افغان سرزمین کے استعمال پر بھی تشویش کا اظہار کیا۔ انہوں نے کہا کہ پاکستان نے بنوں چھاؤنی پر تحریک طالبان پاکستان کے حملے کے بارے میں اپنے شدید تحفظات افغان عبوری حکومت کو پہنچا دئیے ہیں۔ انہوں نے طالبان حکومت پر زور دیا ہے کہ وہ حافظ گل بہادر گروپ کے خلاف موثر اور فوری کارروائی کرے۔

انہوں نے کہا کہ پاکستان نے افغانستان کے ساتھ ہشت گرد گروپس اور حملہ آوروں کے خلاف انٹیلی جنس شیئر کی ہے اور گزشتہ کئی ماہ سے اس معاملے پر افغانستان کے ساتھ مسلسل رابطے میں ہے۔

ترجمان دفتر خارجہ نے ملالہ یوسفزئی کے اس بیان پر بھی ردعمل دیا جس میں انہوں نے پاکستان میں مقیم افغان شہریوں کے بارے میں تشویش کا اظہار کیا تھا۔ انہوں نے کہا کہ پاکستان کے امیگریشن قوانین واضح ہیں اور خلاف ورزی کرنے والوں کو ڈی پورٹ کیا جاتا ہے۔ انہوں نے مزید کہا کہ پاکستان 44,000 افغان شہریوں کو تیسری ملک جانے میں مدد فراہم کر رہا ہے۔

ممتاز زہرا بلوچ نے 9 محرم کو مسقط میں امام بارگاہ علی ابن ابی طالب پر حملے کی بھی مذمت کی۔ انہوں نے کہا کہ یہ دہشت گردی کا ایک بہیمانہ واقعہ ہے اور پاکستان اپنے بھائیوں اور بہنوں کے ساتھ کھڑا ہے۔

ترجمان دفتر خارجہ نے فلسطینی پناہ گزینوں کے کیمپوں پر حملوں کی مذمت کرتے ہوئے کہا کہ خان یونس مہاجر کیمپ پر حملے میں 19 فلسطینیوں کی شہادت اقوام متحدہ کے قوانین کی خلاف ورزی ہے۔

انہوں نے بریفنگ کے دوران سری نگر میں محرم کے جلوس کے شرکاء کی گرفتاریوں کی بھی مذمت کی اور گرفتار عزاداروں کی فوری رہائی کا مطالبہ کیا۔

بریفنگ کے دوران انہوں نے مزید کہا کہ ترکمانستان کے وزیر خارجہ رشید میرادوف جلد ہی پاکستان کا دورہ کریں گے۔ دونوں ممالک کے درمیان دوطرفہ تعلقات پر بات چیت ہوگی۔