بھارتی جاسوس کلبھوشن یادیو کو وکیل فراہم کرنے کا کیس بغیر کارروائی 5 اکتوبر تک ملتوی

تفصیلات کے مطابق چیف جسٹس اطہر من اللہ کی سربراہی میں لارجر بنچ نے کیس پر آج دن بارہ بجے سماعت کرنا تھی، اسلام آباد ہائیکورٹ نے اٹارنی جنرل کی درخواست پر کیس کی سماعت ملتوی کر دی۔ گزشتہ سماعت میں عدالت نے کلبھوشن کو وکیل فراہم کرنے سے متعلق بھارت کو ایک اور مہلت دی تھی  ، عدالت نے حکومت کو عدالتی کاروائی سے متعلق بھارت کو آگاہ کرنے کی ہدایت کی تھی ۔ عدالت نے قرار دیا تھا عدالتی کارروائی کا مقصد عالمی عدالت کے فیصلے پر عمل درآمد یقینی بنانا ہے،اٹارنی جنرل نے عدالت کو بتایا تھا کہ بھارت نے پاکستانی عدالتوں کے سامنے پیش ہونے سے انکار کیا ہے ۔ سیکریٹری قانون کی کلبھوشن کو وکیل فراہمی کی درخواست پر سماعت گزشتہ سال اگست سے زیر سماعت ہے۔

خیال رہے کہ پاکستانی حکام کے مطابق کلبھوشن یادیو پاکستان میں جاسوسی اور دہشت گردی کی کارروائیوں میں ملوث تھے اور انہیں مارچ 2016 کو بلوچستان کے علاقے ماشخیل سے گرفتار کیا گیا تھا۔ حراست کے چند ہی روز بعد پاکستان کی جانب سے کلبھوشن یادو کا زیر حراست اعترافی بیان ویڈیو کی صورت میں جاری کیا گیا اور بلوچستان حکومت نے دہشت گردی کی دفعات کے تحت ان کے خلاف ایف آئی آر درج کروائی۔

اپریل 2017 میں کلبھوشن یادیو کو فوجی عدالت نے ملک میں جاسوسی کا مجرم قرار دیا اور 10 اپریل کو انہیں سزائے موت سنائی گئی۔ جس کے بعد بھارت یہ معاملہ عالمی عدالت انصاف لے گیا جس کے بعد  گزشتہ برس فروری میں عالمی عدالت انصاف میں کیس کی سماعت ہوئی اور جولائی میں فیصلہ آیا۔

17 جولائی 2019 کو عالمی عدالت  کے فیصلے  کے مطابق کلبھوشن یادیو کو پاکستانی فوجی عدالت کی جانب سے دیا جانے والا سزائے موت کا فیصلہ منسوخ اور کلبھوشن کی حوالگی کی بھارتی استدعا مسترد کردی گئی تھی۔عدالت نے اپنے فیصلے میں پاکستان کو ہدایت کی تھی کہ وہ کلبھوشن کو قونصلر رسائی دے، جس پر پاکستان نے بھارتی جاسوس کو قونصلر رسائی فراہم کردی تھی ۔

قبل ازیں دسمبر 2017 میں پاکستان نے کلبھوشن یادیو سے ان کی اہلیہ اور والدہ کی ملاقات بھی کروائی تھی۔