کسی کو اچھا لگے یا برا ، عمران خان سیاسی حقیقت ہیں، شاہ محمود قریشی

تحریک انصاف کے رہنما شاہ محمود قریشی نے کہا ہے کہ کسی کو اچھا لگے یا برا ، عمران خان سیاسی حقیقت ہیں ، 75 برسوں سےغداری کے سرٹیفکیٹ بانٹے جا رہے ہیں۔

کوٹ لکھپت جیل میں صحافیوں سے گفتگو کرتے ہوئے شاہ محمود قریشی نے کہا کہ بانی پی ٹی آئی کی سیاسی حقیقت کو تسلیم کیے بغیر سیاسی استحکام نہیں آ سکتا۔ نواب اکبر بگٹی کے ساتھ جو ہوا ، ظلم تھا ، وہ پاکستان مخالف نہیں تھے۔ ایک دوسرے کو غدار کہنا بند ہونا چاہئیے۔

انہوں نے مزید کہا کہ 40 سال سے سیاست کر رہا ہوں ، 39 سال تک کوئی مقدمہ درج نہیں ہوا۔ ایک سال میں درجنوں مقدمات بنا دئیے گئے۔ بلاول بھٹو کا عدلیہ کے بارے میں بیان غیر ذمہ دارانہ ہے۔

ان کا مزید کہنا تھا کہ محمود اچکزئی جمہوری ہیں ، جمہوری اور آئینی سوچ رکھنے والا غدار نہیں ہو سکتا ، بلوچستان میں امن کا راستہ مذاکرات سے ہو کر گزرتا ہے۔