ہفتہ وار مہنگائی کی شرح میں 0.30 فیصد کا اضافہ

اسلام آباد: ایک ہفتے کے دوران مہنگائی کی شرح میں 0.30 فیصد کا اضافہ ریکارڈ کیا گیا ہے۔

 

ادارہ شماریات نے ہفتہ وار بنیادوں پر مہنگائی کے اعدادوشمار جاری کردیے ہیں، مہنگائی کی سالانہ مجموعی شرح 17.96 فیصد ہوگئی جب کہ ایک ہفتے کے دوران مہنگائی کی شرح میں 0.30 فیصد کا اضافہ ریکارڈ کیا گیا ہے۔

 

ادارہ شماریات کے مطابق ایک ہفتے کے دوران 23 اشیاء مہنگی اور 7 اشیاء سستی ہوئیں جب کہ 21 اشیاء ضروریہ کی قیمتوں میں استحکام رہا۔ پیاز کی فی کلو قیمت میں 36 روپے اضافہ، انڈے فی درجن 11 روپے 17 پیسے مہنگے ہوئے کن کہ لہسن کی فی کلو قیمت میں 16 روپے تک اضافہ ہوا۔

 

ادارہ شماریات کا کہنا ہے کہ ایل پی جی کا گھریلو سلنڈر 52 روپے 65 پیسے مہنگا ہوا، دال ماش کی فی کلو قیمت میں 5 روپے 58 پیسے کا اضافہ ہوا، زندہ مرغی فی کلو 2 روپے 36 پیسے مہنگی ہوئی جب کہ آلو، ٹوٹا باسمتی چاول، تازہ دودھ، مٹن، گھی، خوردنی تیل مہنگی ہونے والی اشیاء میں شامل ہیں۔

 

دوسری جانب ادارہ شماریات کے مطابق ایک ہفتے میں ٹماٹر فی کلو 27 روپے 23 پیسے سستے ہوئے، آٹے کے 20 کلو تھیلے میں 26 روپے 57 پیسے کی کمی ہوئی، دال مسور، کیلے، چینی اور سادہ ڈبل روٹی کی قیمت میں بھی کمی ہوئی۔