لیفٹیننٹ عزیر محمود ملک شہید کی نماز جنازہ  اتوار کو پشاور میں ادا

لیفٹیننٹ عزیر محمود ملک شہید کی نماز جنازہ  اتوار کو پشاور میں ادا کی گئی۔

کورکمانڈر پشاور، شہید کے اہل خانہ اور سول اور فوجی عہدیداروں نے ان کی نمازجنازہ میں شرکت کی ، لیفٹیننٹ عزیر محمود ملک شہید کو پورے فوجی اعزاز کے ساتھ ضلع اٹک میں ان کے آبائی علاقے میں سپردخاک کیا جائے گا۔

وہ کمبائنڈ ملٹری ہسپتال پشاور میں زخموں کی تاب لاتے ہوئے شہید ہو گئے تھے ، فوج کے شعبہ تعلقات عامہ کے مطابق گزشتہ جمعے کو لیفٹیننٹ عزیر محمود ملک نے باغ میں ایک مقام پر بہادری سے لڑتے ہوئے چار خوارج کو ہلاک کیا۔تاہم فائرنگ کے شدید تبادلے کے دوران وہ شدید زخمی ہوئے اور سی ایم ایچ پشاور میں زیرعلاج تھے۔

 صدر آصف علی زرداری اور وزیراعظم شہبازشریف نے لیفٹیننٹ عزیر محمود ملک کی شہادت پر گہرے دکھ اور افسوس کا اظہار کیا ہے۔

انہوں نے آج اپنے الگ الگ تعزیتی پیغامات میں مرحوم کے درجات کی بلندی کیلئے دعا کی ، انہوں نے غمزدہ خاندان سے بھی تعزیت کی اور مادروطن کے دفاع میں اپنی جان کا نذرانہ پیش کرنے پر لیفٹیننٹ عزیر محمود ملک شہید کو خراج عقیدت پیش کیا۔

صدر آصف علی زرداری نے اپنے پیغام میں دہشت گردوں کے خلاف کارروائیاں جاری رکھنے کا عزم ظاہر کیا ، وزیراعظم شہبازشریف نے اپنے پیغام میں کہا کہ پاک فوج کے افسر اور جوان پاکستان کی سرزمین کو فتنہ الخوارج سے پاک کرنے کے لئے کوشاں ہیں۔

انہوں نے کہا کہ میرے سمیت پوری قوم دہشت گردی کے خلاف جنگ میں مسلح افواج کے شانہ بشانہ کھڑی ہے۔