کراچی : مون سون کی آمد ، نالوں کی صفائی کا کام مکمل نہ ہوسکا

تفصیلات کے مطابق  محکمہ موسمیات نے  جون کے آخری ہفتے میں مون سون بارشوں کی پیشگوئی کردی ہے ،   تاہم پیش گوئی کے باوجود کراچی کی ضلعی انتظامیہ نے نکاسی آب کے نالوں کی صفائی کو یقینی نہیں بنایا ہے ،میٹروپولٹین کے کچھ علاقوں میں جہاں نالوں کو  صفائی کاکام انتہائی  سست رفتار ی سے چل رہا ہے۔

میڈیا رپورٹس کے مطابق  شہر میں 500سے زائد نالے  ہیں جن میں سے بیشتر بند پڑے ہیں یا  کچھ پر تجاوزات ہیں  ، لہذا شدید بارشوں سے قبل  انہیں  صاف کرنے کی اشد  ضرورت ہے۔

  وفاق اور صوبائی حکومت زبانی جمع خرچ  تک  محدود ہے ،  تجاوزات کےخلاف آپریشن کے باوجود گجر نال مکمل  صاف نہیں کیا جاسکا  ہے جبکہ محمود آباد ، کورنگی ، غربی کے نالوں کا بھی کوئی پرسان حال نہیں ، شدید بارشوں کی صورت میں یہ علاقے پھر زیر آب  آنے کا خدشہ ہے ۔

دوسری جانب محکمہ موسمیات کا کہنا ہے کہ آئندہ 24 گھنٹوں کے دوران شہر کا موسم گرم، مرطوب اور ابر الود رہنے کا امکان ہے، جبکہ کراچی میں آج آندھی اور درمیانے درجہ کی بارش کا امکان ہے۔ سندھ کے دیگر شہروں میں بھی بادلوں کے ڈیرے ہیں اور کئی شہروں میں بارش کا امکان ظاہر کیا گیا ہے۔

صوبائی ڈیزاسٹرمینجمنٹ اتھارٹی  نے کراچی سمیت سندھ میں مون سون بارشوں کی پیشگوئی کے پیش نظر تمام اداروں کو الرٹ رہنے کا حکم دے دیا۔صوبائی ڈیزاسٹر مینجمنٹ اتھارٹی (PDMA) نے ضلعی انتظامیہ کو ہدایت کی ہے کہ وہ مون سون کے پیش نظر قبل از وقت حفاظتی اقدامات کرے تاکہ لوگوں کی جان و مال کی حفاظت کو یقینی بنایا جا سکے۔

یاد رہے محکمہ موسمیات نے پاکستان میں مون سون بارشوں کی پیشگوئی کرتے ہوئے کہا تھا کہ مختلف علاقوں میں اس سال معمول سےزیادہ بارشیں متوقع ہے، مون سون کاسیزن جولائی سےستمبر3ماہ پرمشتمل ہوتاہے۔اس دوران جنوبی وشمالی پنجاب اورسندھ میں معمول سے زائد بارشیں ہوں گی، جس کے باعث پنجاب، سندھ ،خیبرپختونخواہ  میں اربن فلڈنگ کے خدشات ہیں۔