پاکستان کے پاس ایک مضبوط فاسٹ بولنگ اٹیک ہے ،شان مسعود 

راولپنڈی : پاکستان کرکٹ ٹیم کے کپتان شان مسعود نے بنگلادیش کے خلاف ہونے والی ٹیسٹ سیریز سے قبل پریس کانفرنس کرتے ہوئے کہا ہے کہ پاکستان کے پاس ایک مضبوط فاسٹ بولنگ اٹیک ہے اور وہ اسے اپنی قوت سمجھتے ہیں۔

شان مسعود کا کہنا تھا کہ ہمارے پاس 6 کوالٹی فاسٹ باؤلرز موجود ہیں اور ہماری کوشش ہوگی کہ اس سیریز میں بہترین کرکٹ کھیلی جائے۔ انہوں نے یہ بھی کہا کہ راولپنڈی کی وکٹ پر اسپن بولنگ زیادہ مؤثر ثابت ہوگی لیکن فاسٹ بولرز بھی اہم کردار ادا کریں گے۔

کپتان نے محمد ہریرہ کو اسکواڈ میں شامل کرنے کی وجہ بتاتے ہوئے کہا کہ وہ گزشتہ کئی سالوں سے ڈومیسٹک کرکٹ میں بہترین کارکردگی کا مظاہرہ کر رہے ہیں اور انہیں ٹیم میں شامل کرکے ان کا پوٹینشل دیکھنا چاہتے ہیں۔ انہوں نے یہ بھی کہا کہ امام الحق کو اس سیریز میں آرام دیا گیا ہے اور محمد ہریرہ کو اوپننگ کی ذمہ داری سونپی جا سکتی ہے۔

شان مسعود نے آسٹریلیا کے خلاف سیریز کا تجربہ شیئر کرتے ہوئے کہا کہ بدقسمتی سے وہ سیریز جیت نہیں سکے لیکن انہوں نے اچھی کرکٹ کھیلی۔ انہوں نے خاص طور پر عامر جمال کی تعریف کی اور کہا کہ وہ آسٹریلیا میں پاکستان کے لیے بہترین ہتھیار ثابت ہوئے۔

شان مسعود نے واضح کیا کہ ان کا مقصد ہوم سیریز جیتنا ہے اور وہ اس کے لیے پوری کوشش کریں گے۔ انہوں نے کہا کہ ورلڈ ٹیسٹ چیمپئن شپ میں کوئی بھی ٹیم کمزور نہیں ہے اور ہمیں اپنی کارکردگی پر توجہ مرکوز کرنے کی ضرورت ہے۔

کپتان نے صائم ایوب کی بھی تعریف کی اور کہا کہ وہ بھی فارم میں ہیں اور انہیں بھی بھرپور موقع دیا جائے گا۔