اسلام آباد میں سیاسی جلسے کے پیش نظر سخت سکیورٹی کے انتظامات، سکول بند

اسلام آباد: پاکستان تحریک انصاف کے جلسے کے پیش نظر اسلام آباد میں سخت سکیورٹی کے انتظامات کیے گئے ہیں۔ شہر کے ریڈ زون کو مکمل طور پر سیل کر دیا گیا ہے اور تمام سرکاری و نجی سکولوں میں آج تعطیل کا اعلان کر دیا گیا ہے۔

وزارت داخلہ کی ہدایات پر اسلام آباد کی ضلعی انتظامیہ نے یہ فیصلہ کیا ہے۔ ڈپٹی کمشنر اسلام آباد کے مطابق بچوں کی حفاظت کو مدنظر رکھتے ہوئے یہ فیصلہ لیا گیا ہے۔ ذرائع کے مطابق پی ٹی آئی کے جلسے کے علاوہ ایک مذہبی جماعت کے احتجاج کی کال کے پیش نظر بھی یہ اقدام کیا گیا ہے۔

جلسے اور مظاہروں کی وجہ سے آج میٹرو بس سروس بھی معطل رہے گی اور میٹرو بس سٹیشنز پر سکیورٹی بڑھا دی گئی ہے۔

اسلام آباد کے علاوہ پنجاب حکومت نے بھی صوبے بھر میں دفعہ 144 نافذ کر دی ہے۔ اس کے تحت 22 سے 24 اگست تک تمام قسم کے سیاسی و عمومی اجتماعات پر پابندی عائد ہوگی۔