دہشتگردی کے کسی گروہ سے کوئی رعایت نہیں برتی جائےگی، محسن نقوی

کوئٹہ: وفاقی وزیر داخلہ محسن نقوی نے کہا ہے کہ بلوچستان میں دہشت گردی کے واقعات میں ملوث کسی گروہ سے کوئی رعایت نہیں برتی جائے گی اور دہشت گردوں اور ان کے سہولت کاروں کو اینٹ کا جواب پتھر سے دیا جائے گا۔

وفاقی وزیر داخلہ محسن نقوی نے گورنر بلوچستان جعفر خان مندوخیل سے ملاقات کے دوران گفتگو کرتے ہوئے محسن نقوی نے کہا کہ بلوچستان میں قیام امن کے لیے ہر سطح پر فوری اقدامات کیے جائیں گے۔ دہشت گردوں سے کوئی مذاکرات نہیں ہوں گے اور اس فتنے کا سر سختی سے کچلا جائے گا۔

وزیر اعظم کی صدارت میں ہونے والی ایپکس کمیٹی کے اجلاس میں فیصلہ کیا گیا ہے کہ ریاست کو نہ ماننے والوں سے آہنی ہاتھوں سے نمٹا جائے گا۔ محسن نقوی نے کہا کہ بلوچستان کی سکیورٹی فورسز، فرنٹیئر کور، پولیس اور لیویز کی ضروریات کو پورا کیا جائے گا اور بلوچستان سے دہشت گردوں کا مکمل صفایا کرنے کا وقت آگیا ہے۔

انہوں نے کہا کہ بلوچستان میں امن قائم کرنے کے لیے تمام اسٹیک ہولڈرز کو مل کر کام کرنا ہوگا۔ انہوں نے عوام سے اپیل کی کہ وہ امن کے قیام میں سکیورٹی فورسز کا ساتھ دیں۔

گورنر بلوچستان جعفر خان مندوخیل کا کہنا تھا کہ سکیورٹی فورسز اور عوام ایک ہیں اور چند عناصر امن کو سبوتاژ کرنے کی کوشش کر رہے ہیں۔ انہوں نے ایپکس کمیٹی کے اجلاس میں کیے گئے فیصلوں کو بروقت اور قیام امن کے لیے ناگزیر قرار دیا۔