آئی جی جیل خانہ جات پنجاب کا رات گئے اڈیالا جیل کا اچانک دورہ

لاہور : پنجاب کے آئی جی جیل خانہ جات میاں فاروق نذیر نے رات گئے اچانک اڈیالا جیل کا دورہ کیا۔ انہوں نے خاص طور پر پاکستان تحریک انصاف کے چیئرمین عمران خان کی بیرک کا معائنہ کیا اور جیل حکام سے ان کی سکیورٹی کے انتظامات کے بارے میں تفصیلی بریفنگ لی۔

آئی جی جیل خانہ جات نے جیل کے مختلف حصوں کا دورہ کیا اور قیدیوں کی سہولیات کا جائزہ لیا۔ انہوں نے جیل حکام سے قیدیوں کے زیر سماعت مقدمات، جیل میں انٹرنیٹ، وائی فائی، موبائل فون سروس اور دیگر آلات سے متعلق بھی تفصیلی معلومات حاصل کیں۔ 

واضح رہے کہ اڈیالا جیل میں تین نئے افسران کو تعینات کیا گیا ہے۔ علی امیر شاہ کو ایڈیشنل سپرنٹنڈنٹ جیل، عامر فیاض بھٹی کو ڈپٹی سپرنٹنڈنٹ ایجوکیشن اور جماعت علی کو ڈپٹی سپرنٹنڈنٹ جوڈیشل تعینات کیا گیا ہے۔

آئی جی جیل خانہ جات کا کہنا تھا کہ ہماری کوشش ہے کہ تمام قیدیوں کو قانون کے مطابق سہولیات فراہم کی جائیں۔ عمران خان کی سکیورٹی کو یقینی بنانا ہماری اولین ترجیح ہے۔