ملکہ ترنم نور جہاں کی 98ویں یوم پیدائش آج منائی جا رہی ہے

لاہور : پاکستان کی ملکہ ترنم نور جہاں کی 98ویں یوم پیدائش آج سے منائی جا رہی ہے۔ ملکہ ترنم نور جہاں 21 ستمبر 1926 کو قصور میں پیدا ہوئیں اور اپنی جاوداں آواز سے لاکھوں دلوں پر راج کرنے والی اس فنکارہ نے 23 دسمبر 2000ء کو دنیا کو الوداع کہا تھا۔

نورجہاں نے اپنے فنی سفر کا آغاز 1935 میں بطور چائلڈ اسٹار فلم ’’پنڈ دی کڑیاں‘‘ سے کیا تھا۔ انہوں نے اپنی زندگی میں 995 فلموں کے لیے نغمات ریکارڈ کروائے اور تقریباً 10 ہزار سے زائد گیت گائے۔ ان کی آواز کا جادو آج بھی لوگوں کو مسحور کر دیتا ہے۔

ملکہ ترنم نور جہاں نے نہ صرف فلمی دنیا میں اپنا لوہا منوایا بلکہ 1965 کی پاک بھارت جنگ کے دوران قومی نغمے گاکر قوم کو متحد کرنے میں بھی اہم کردار ادا کیا۔ ان کی خدمات کے اعتراف میں حکومت پاکستان نے انہیں صدارتی تمغہ برائے حسن کارکردگی اور نشان امتیاز سے نوازا تھا۔

آج بھی نور جہاں کی آواز لوگوں کے دلوں میں زندہ ہے۔ ان کی یاد میں مختلف ادبی اور ثقافتی ادارے سالگرہ کی تقریبات کا اہتمام کر رہے ہیں۔