صیہونی فوج کا غزہ میں اسکول پر راکٹ حملہ، خواتین اور بچوں سمیت 22 افراد شہید

صہیونی فوج نے ہفتے کو غزہ سٹی کے جنوبی حصے میں ایک اسکول پر راکٹ برسادیے جس کے نتیجے میں خواتین اور بچوں سمیت 22 افراد شہید ہوئے۔

غیر ملکی خبر رساں ایجنسی کے مطابق جس اسکول کو نشانہ بنایا گیا اس میں بے گھر افراد نے پناہ لے رکھی تھی جن میں خواتین اور بچوں کی تعداد زیادہ تھی۔ اسرائیلی فوج کا دعوٰی ہے کہ اسکول کی عمارت میں حماس کا کمانڈ سینٹر قائم تھا جسے نشانہ بنایا گیا۔

حماس نے ایک بیان میں دعوٰی کیا ہے کہ اسکول پر حملے میں جو 22 افراد مارے گئے ان میں 13 خواتین اور 6 بچے تھے۔ عینی شاہد سعید الملاحی نے بتایا کہ خواتین بچوں کے ساتھ اسکول کے میدان میں تھیں۔ بچے کھیل رہے تھے کہ دو راکٹ وہاں آکر پھٹے۔

ایک اور عینی شاہد احمد عظام نے کہا کہ میں نے اسکول میں کسی بھی مرد کو زخمی نہیں تھا۔ شہید اور زخمی ہونے والے بچے تھے یا پھر خواتین۔ احمد عظام نے کہا کہ ہم مر رہے ہیں مگر ہمارے اسلامی پڑوسی صرف تماشا دیکھ رہے ہیں۔ وہ اپنی زندگی میں مست ہیں اور اسرائیل سے پینگیں بڑھانے میں مصروف ہیں۔ مظلوم فلسطینیوں کی مدد کرنے کے لیے مسلم دنیا میں سے کوئی بھی آگے نہیں بڑھ رہا۔