حکومت کے ساتھ ہونے والے راولپنڈی معاہدے کی مدت مکمل ہو گئی ہے، امیر جماعت اسلامی

جماعت اسلامی کے امیر حافظ نعیم الرحمن کا کہنا ہے کہ حکومت کے ساتھ ہونے والا راولپنڈی معاہدے کی مدت مکمل ہو گئی ہے، کل آئندہ کے لائحہ عمل کا اعلان کریں گے۔
انہوں نے کہا کہ حکومت نےعوامی ریلیف کے لیے کوئی اقدامات نہیں کیے، لانگ مارچ سمیت بجلی کے بل ادا نہ کرنے کا آپشن موجود ہے، حکمران اپنی عیاشیاں اور شاہ خرچیاں ختم کریں۔

ان کا کہنا تھا کہ تاجرو ں اور عوام پر ظالمانہ ٹیکس واپس لیے جائیں، آئی پی پیز کو نوازنا بند کیا جائے، کیپسٹی چارجز ختم کیے جائیں، قومی اداروں کی لوٹ سیل کی ہر گزحمایت نہیں کریں گے۔

امیر جماعت اسلامی کا کہنا تھا کہ اصل لاگت پرملک بھر میں بجلی کا یکساں ٹیرف نافذ کیا جائے، پٹرول کی قیمت عالمی منڈی کے مطابق کر کے لیوی ختم کی جائے اور حکومت جاگیرداروں پر ٹیکس لگائے۔

انہوں نے کہا کہ چند خاندانوں کے ہاتھوں میں پورا نظام چل رہا ہے، 7 اکتوبر کو اہل غزہ و فلسطین سے اظہار یکجہتی کا ہفتہ منایا جائے گا۔