بشریٰ بی بی سے ملاقات کے لیے بیٹیاں عدالت پہنچ گئیں

سابق وزیر اعظم عمران خان کی اہلیہ  بشری ٰ بی بی سے ملاقات کے لیے ان کی بیٹیوں نے عدالت سے رجوع کر لیا، درخواست بیرسٹر سلمان صفدر اور خالد یوسف چودھری کے ذریعے دائر کی گئی۔

سپیشل جج سینٹرل اسلام آباد شاہ رخ ارجمند نے درخواست پر سماعت کرتے ہوئے سپرنٹنڈنٹ اڈیالہ جیل سے کل تک جواب طلب کر لیا۔

درخواست میں موقف اپنایا گیا کہ تین ہفتوں سےبیٹیوں کی  والدہ سے ملاقات نہیں ہوئی، بشریٰ بی بی ناحق قید ہیں اور ان کو بنیادی حقوق سے محروم رکھا جا رہا ہے، فیملی کا حق ہوتا ہے کہ وہ ہر ہفتے قیدی سے ملاقات کر سکتے ہیں۔

درخواست گزار کے مطابق سرکاری حکام کی جانب سے ملاقات کی اجازت نہیں دی جا رہی، یہ بنیادی حقوق کے خلاف ہے جلد از جلد ملاقات کا بندوبست کیا جائے۔

بعدازاں عدالت نے نوٹس جاری کرتے ہوئے سماعت کل تک ملتوی کردی۔