روس کی برطانوی بحری جہاز پر سمندری حدود کی خلاف ورزی کرنے پر فائرنگ

تفصیلات کے مطابق عام طور پر مغربی ممالک کے بحری جہازوں کا روسی حدود میں جانا غیر معمولی بات نہیں لیکن اس طرح کے کھلے عام فائرنگ کے واقعات بہت کم ہوتے ہیں۔ یہ واقع اس وقت پیش آیاہے جب روس کے امریکہ ،برطانیہ اور نیٹو  سے تعلقات میں کچھ تناؤ پایا جارہا ہے ۔

روس کے دفاعی حکام کا یہ کہنا ہے کہ پہلے برطانوی بحری جہاز کو وارنگ دی گئی تھی اگر ہماری سمندری حدود کی خلاف ورزی ہوئی تو ہم کارروائی کریں گے ۔جب برطانوی بحری جہاز نے خلاف ورزی کی تو سرحدی گشت پر مامور روسی بحری جہاز نے انتباہی فائرنگ کی جس کے بعد برطانوی جہاز روسی حدود سے نکل گیا ۔

ماسکو میں برطانوی دفاعی اتاشی کو روسی وزارت دفاع میں طلب کرلیا گیاہے جبکہ برطانوی وزارت دفاع کا کہنا ہے کہ رائل نیوی کا بحری جہاز بین الاقوامی قانون کے مطابق یوکرین کی حدود سے گزر رہا تھا اور اس پر کوئی انتباہی فائرنگ نہیں کی گئی۔

روسی صدر ولادی میر پیوٹن نے روسی حدود کے قریب نیٹو کی سرگرمیوں پر تشویش کا اظہار کیا ہےاور کہا ہے کہ نیٹو نے ہماری تعمیری تجاویز پر غور کرنے سے انکار کردیاہے امریکا روس کے منع کرنے کے باوجود یوکرین کی حمایت کے لیے خطے میں مسلسل اپنے جہاز بھیج رہا ہے۔