بشریٰ بی بی اڈیالہ جیل سے رہا

 اسلام آباد ہائیکورٹ نے گزشتہ روز توشہ خانہ کیس ٹو میں سابق وزیراعظم عمران خٓان کی اہلیہ بشریٰ بی بی کی درخواست ضمانت منظور کرتے ہوئے ان کی رہائی کا حکم دیا تھا،تاہم سینئر اسپیشل جج سینٹرل شاہ رخ ارجمند کی عدم دستیابی اور اسپیشل جج سینٹرل نمبر ٹو ہمایوں دلاور کی رخصتی کے باعث بشریٰ بی بی کی رہائی کی روبکار جاری نہ ہوسکی تھی۔

 پاکستان تحریک انصاف کے وکلا مچلکے جمع کرانے کے لیے عدالتوں کے چکر لگاتے رہے  مگر عدالتی وقت ختم ہوگیا، جس پر  وکلا نے ایڈمنسٹریٹو جج جواد عباس کی عدالت کا رخ کیا مگر وہ بھی جاچکے تھے۔

تاہم آج بشری بی بی کے وکلا نے اسپیشل جج سینٹرل شاہ رخ ارجمند کی عدالت میں ضمانتی مچلکے جمع کروا دیے جس کے بعد بشری بی بی کی رہائی کے روبکار جاری کردی گئی۔

بشریٰ بی بی کا ضمانتی مچلکہ ملک طارق محمود نون نے جمع کرایا جس کے بعد ان کی رہائی کی روبکار اڈیالہ جیل میں جمع کروا دی گئی جس کے بعد بشریٰ بی بی کو انتہائی سخت سکیورٹی میں اڈیالا جیل کے گیٹ نمبر 5 سے گھر کے لیے روانہ کیا گیا۔