مقبوضہ کشمیر میں فوج کی بھاری تعداد میں موجودگی، طلبا کی تعلیم بُری طرح متاثر

بھارت کے زیرِ قبضہ جموں و کشمیر میں فوج کی بھاری تعداد میں موجودگی سے طلبا کی تعلیم بُری طرح متاثر ہونے لگی ہے۔

کشمیر میڈیا سروس کی رپورٹ کے مطابق بھارتی فوجی طلبا کیلیے تعلیم کا حصول آسان بنانے کے بجائے انہیں ہراساں کرتے اور تذلیل کرتے ہیں جبکہ مقبوضہ علاقے میں فلاح عام ٹرسٹ کے زیرِ انتظام سینکڑوں اسکولوں پر پابندی ہے۔

رپورٹ میں بتایا گیا کہ اسکولوں میں مسلمان طلبا کو ہندو بجن گانے اور سوریہ نمسکار کرنے پر مجبور کیا جاتا ہے، مودی حکومت کی تعلیمی پالیسی آر ایس ایس کے نظریے کی عکاس ہے۔

کشمیر میڈیا سروس کے مطابق ضلع اسلام آباد میں ایک کشمیری کا رہائشی مکان قرق کیا گیا اور شہری جاوید احمد بٹ پر منشیات فروشی کا جھوٹا الزام عائد کیا گیا۔املاک کی قیمت 50 لاکھ روپے سے زائد بتائی جا رہی ہے، ایجنسیز اور پولیس منشیات فروشی کے الزامات کی آڑ میں آزادی پسندوں کو نشانہ بنا رہی ہیں۔