بابا گرونانک کا یوم پیدائش ، 3 ہزار سے زائد سکھ یاتریوں کو ویزے جاری

پاکستان نے سکھ مذہب کے بانی بابا گرونانک کی 555 ویں  یوم پیدائش پر 3 ہزار سے زائد سکھ یاتریوں کو ان کی مذہبی رسومات کی ادائیگی کے لیے ویزے جا ری کر دیے۔

ترجمان پاکستانی ہائی کمیشن کا کہنا ہے کہ بھارتی یاتریوں کو 14 سے 23 نومبر تک کا ویزا جاری کیا گیا ہے، بھارتی یاتریوں کو پاک بھارت مذہبی سیاحت کے 1974 کے معاہدے کے تحت ویزے جاری کئے گئے ہیں۔

سکھ یاتری 14 نومبر کی صبح براستہ واہگہ بارڈر  پاکستان آئیں گے جبکہ بابا گورونانک  کے 555 ویں جنم دن کی تقریب 15 نومبر کو گوردوارہ جنم استھان ننکانہ صاحب میں ہوگی، پاکستان میں 10 روزہ قیام کے دوران بھارتی سکھ یاتری گوردوارہ پنجہ صاحب حسن ابدال، گوردوارہ سچا سودا فاروق آباد، گوردوارہ روڑی صاحب ایمن آباد کے بھی درشن اور یاترا کریں گے۔

سکھ یاتری گوردوارہ دربار صاحب کرتارپور میں 19 نومبر کو ہونے والی تقریب میں شریک ہوں گے جبکہ گوردوارہ ڈیرہ صاحب لاہور میں قیام کے بعد بھارتی یاتری 24 نومبر کو واہگہ بارڈر کے راستے واپس لوٹ جائیں گے۔

 جبکہ پاکستان سکھ گوردوارہ پربندھک کمیٹی کے پردھان سردار رمیش سنگھ اروڑہ نے بھارتی یاتریوں سے اپیل کی ہے کہ وہ پاکستان آتے وقت بھارتی کرنسی کی بجائے ڈالر لیکرآئیں تاکہ یہاں انہیں کرنسی نوٹ تبدیل کروانے اور کم ریٹ ملنے کی شکایات نہ ہو۔