محکمہ تعلیم سندھ کا میٹرک اور  انٹر کے امتحانات مارچ اور اپریل میں لینے کا فیصلہ

محکمہ تعلیم سندھ نے میٹرک اور  انٹر کے امتحانات مارچ اور اپریل میں لینے کا فیصلہ کرلیا۔

تفصیلات کے مطابق محکمہ تعلیم سندھ کی اسٹیئرنگ کمیٹی کے اجلاس کے فیصلوں کا نوٹیفکیشن جاری کردیا گیا ہے۔

محکمہ تعلیم سندھ کی جانب سے جاری نوٹیفکیشن کے مطابق صوبے میں نویں اور دسویں جماعت کے امتحانات 15 مارچ اور گیار ویں اور بارویں جماعت کے امتحانات 15 اپریل سے شروع کرنے کا فیصلہ کیا گیا ہے۔

واضح رہے کہ نوٹیفکیشن میں نتائج کے حوالے سے بھی بتادیا گیا ہے، میٹرک کے نتائج 15 جولائی اور انٹر کے نتائج 15 اگست تک آئیں گے۔

اس کے علاوہ نوٹیفکیشن میں یہ بھی بتایا گیا ہے کہ سندھ میں اسکولوں میں تعلیمی سال26-2025 یکم اپریل سے شروع  کیا جائے گا جبکہ کالجز میں نیا تعلیمی سال یکم اگست 2025 میں شروع ہوگا۔

بعدازاں موسم سرما اور گرما کی تعطیلات کا پرانا شیڈول برقرار ہے، موسم گرما کی تعطیلات یکم جون سے 31 جولائی اور موسم سرما کی تعطیلات 22 دسمبر سے 31 دسمبر تک ہوں گی۔