پی ٹی آئی کا دور حکومت  پی آئی اے کےزوال کا دور تھا ، وزیر دفاع خواجہ آصف

وزیر دفاع خواجہ محمد آصف کا کہنا ہے کہ پی ٹی آئی کا دور حکومت پی آئی اے کے لیے زوال کا دور تھا،پی ٹی آئی حکومت میں ایک وزیر کے بیان سے پی آئی اے کو نقصان پہنچا جس سے پی آئی اے کا یہ حشر ہوا، امید ہے کہ اب قومی ائیر لائن کی حالت بہتر ہو گی۔

قومی اسمبلی میں اظہار خیال کرتے ہوئے خواجہ آصف  نےکہا پی ٹی آئی کے وزیر کے بیان نے پی آئی اے کا حشر کیا یورپی یونین نے پی آئی اے کو اجازت دی ہے ،جنوری کے آخر میں یوکےسے تفصیلی آڈٹ کیلئے وفد آئے گا ، ان کا کہنا تھا کہ  یورپی یونین کے آڈٹ کے بعد پی آئی اے کے مزید  روٹ بحال ہوگئے ہیں، یورپی یونین کے آڈٹ کے بعد اب انگلینڈ کی آڈٹ ٹیم بھی جلد آرہی ہے اور امید ہے وہ روٹ بھی بحال ہوں گے۔

وفاقی وزیر خواجہ آصف نے کہا کہ پی آئی اے پرائیویٹائزیشن کے پراسس میں بھی ہے ،پی آئی اے منافع بخش ائیر لائن بھی ہو جائے گی ،پی آئی اے کے جہاز جو روٹ بند تھے ان کے اوپر بھی چلا سکیں گے۔ان کا مزید کہنا تھا کہ گوادر ، سندھ اور شمالی علاقوں میں چھوٹی ائیر لائن چلائی جا سکیں گی ،چھوٹی ائیر لائن چلانے سے کنکٹیویٹی بڑھے گی۔

وفاقی وزیر نے کہا کہ کراچی تا اسکردو ہفتے میں دو فلائٹس ہیں، جبکہ کراچی سکھر 7 فلائٹس ہیں۔ قومی ایئرلائن کی 800 ارب کی ذمہ داری حکومت نے اٹھا لی ہے۔