اسرائیل کا گولان کی پہاڑیوں پر قائم یہودی بستیوں میں توسیع کا اعلان

 اسرائیل نے گولان کی پہاڑیوں پر موجودیہودی بستیوں میں توسیع کا اعلان کردیا،اسرائیلی میڈیا کے مطابق  وزیر اعظم نتین یاہو نے گولان پہاڑیوں پر موجود یہودی بستیوں کی توسیع کے منصوبے کی منظوری دے دی۔

اسرائیلی وزیراعظم نیتن یاہو کا مزید کہنا تھا کہ اسرائیل گولان کی پہاڑیوں پر اپنا قبضہ جاری رکھے گا اورپہاڑیوں پر یہودی آباد کاری کو بڑھائے گا،نتین یاہو نے مزید کہا کہ گولان کی پہاڑیوں کو مضبوط کرنا اسرائیل کو مضبوط کرنے کے برابر ہے، اسرائیلی فوج گولان کی پہاڑیوں پر شام کے ساتھ بفر زون میں موجود رہے گی۔

دوسری جانب بشار الااسد کی حکومت کےخاتمے کے بعد شام پر اسرائیل کے فضائی حملے بھی جاری ہیں، صہیونی فوج نے شام کی فوجی تنصیبات پر ایک ہفتے میں 800 سے زائد دفعہ  بمباری کی۔

 اسرائیلی فضائی حملوں سے جنوبی شہر قنیطرہ کا سارا انفرا اسٹرکچر تباہ ہو چکا ہے،اسرائیل نے مزید تین شامی قصبوں پر بھی قبضہ کرلیا ہے۔

شام کی موجودہ صورتحال پر  اسرائیلی وزیراعظم نیتن یاہو نے نومنتخب امریکی صدر ڈونلڈ ٹرمپ سے ٹیلیفونک رابطہ بھی کیا ہے ،ٹیلیفونک گفتگو کے دوران غزہ میں زیر حراست اسرائیلی اور غیر ملکی یرغمالیوں کی رہائی کے لیے حالیہ پیش رفت پر بھی بات چیت کی گئی۔

شام کی صورتحال سے متعلق گفتگو میں نیتن یاہو نے کہا کہ شام کے ساتھ تنازع میں کوئی دلچسپی نہیں رکھتے، شام میں اسرائیلی کارروائیوں کا مقصد ممکنہ خطرات کو ناکام بنانا ہے۔