یونان کشتی حادثے میں ملوث انسانی اسمگلر گرفتار

کئی پاکستانیوں کی موت کا سبب بننے والے یونان کشتی حادثے میں ملوث انسانی اسمگلر کو گرفتار کرلیا گیا ۔ 

ترجمان ایف آئی اے نے بتایا کہ ملزم نے یورپ بھجوانے کیلئے شہری سے ساڑھے 34 لاکھ بٹورے، ملزم نے متاثرہ شہری کو پہلے لیبیا بھجوایا پھر یونان بھجوانے کی کوشش کی۔

ایف آئی اے نے کارروائی کرتے ہوئے یونان کشتی حادثے میں ملوث انسانی اسمگلر کو پھالیہ سے حراست میں لیا، ترجمان نے بتایا کہ ایف آئی اے گوجرانوالہ زون کی جانب سے کارروائی کی گئی، ملزم انسانی اسمگلنگ میں ملوث بین الاقوامی گینگ کا کارندہ ہے۔

خیال رہے کہ گزشتہ ماہ یونان کشتی حادثے میں جاں بحق ہونے والے 15 پاکستانیوں کی میتوں کی شناخت مکمل کرلی گئی تھی جب کہ 3 میتیں لاہور پہنچا دی گئی تھیں۔

ایف آئی اے نے مزید بتایا کہ کشتی حادثے میں متاثرہ شہری احتشام انجم لاپتہ ہے، دیگر ملزمان کی گرفتاری کے لئے چھاپے مارے جارہے ہیں۔

حکام کا کہنا تھا کہ میتیں یونان سے دوحہ اور دوحہ سے لاہور پہنچائی گئی ہیں، اوورسیز پاکستانیز فاؤنڈیشن کے نمائندوں نے میتیں ورثا کےحوالے کی تھیں۔