راستوں کی بندش ،پارا چنار کو جانےوالا امدادی سامان کا قافلہ ٹل سے واپس روانہ

پشاور:راستوں کی بندش کے باعث پاراچنار کو جانے والا امدادی سامان کا قافلہ 4 دن تک انتظار کے بعد ٹل سے واپس روانہ ہواگیا 
اس حوالے سےضلع ہنگو کی انتظامیہ کا کہنا ہے کہ بگن کے قریب مندوری میں احتجاجی دھرنے اور سڑکوں کی بندش کے باعث ٹل سے قافلے کی روانگی ممکن نہیں لہٰذا اشیائے خورد و نوش خراب ہونے کے خدشے کی وجہ سے گاڑیاں واپس گئی ہیں۔
واضح رہے کہ کوہاٹ میں ہونے والے گرینڈ جرگے میں اتفاق رائےاور امن معاہدہ ہونے کے بعد صوبائی حکومت کی جانب سے امدادی سامان  کا قافلہ پارا چنار کے لیے روانہ کیا گیا تھا مگر 4 جنوری کو ڈی سی کرم جاوید اللہ محسود اور سرکاری قافلوں پر فائرنگ کا واقعہ پیش آیا تھا جس کے نتیجے میں ڈپٹی کمشنر جاوید اللہ محسود سمیت سیکیورٹی اہلکار زخمی ہوئے تھے جس کی بعد قافلے کی روانگی کچھ دنوں کے لیے موخر کر دی گئی تھی۔
دوسری جانب مندوری میں دھرنا دینے والے مظاہرین کا مطالبہ ہے کہ نومبر کو ہنگامہ آرائی کرنے والوں کے خلاف مقدمات درج کرکے نقصانات کا ازالہ کیا جائے۔