پارلیمنٹ کا مشترکہ اجلاس : اپوزیشن کی شدید نعرے بازی ، اجلاس 12 فروری تک ملتوی

صدر مملکت آصف علی زرداری نے وزیر اعظم کے حکم  پر آج پارلیمنٹ کا مشترکہ اجلاس طلب کیا ۔

اجلاس شروع ہوتے ہی اپوزیشن نے شور شرابا شروع کر دیا ،  چند بلوں کی منظوری کےبعد پارلیمنٹ کا مشترکہ اجلاس 12 فروری تک ملتوی کر دیا گیا۔
تفصیلات کے مطابق پارلیمنٹ کا مشترکہ اجلاس اسپیکر سردار ایاز صادق کی زیر صدارت تقریباً ایک گھنٹے کی تاخیر سے شروع ہوا تو اپوزیشن لیڈر عمر ایوب نے پوائنٹ آف آرڈر پر بات کرنے کی درخواست کی تاہم اسپیکر نے اپوزیشن لیڈر کو اجازت نہیں دی۔

اپوزیشن لیڈر عمر ایوب کو وقت نہ ملنے  پر اپوزیشن ارکان نے نشستوں پر کھڑے ہوکر احتجاج شروع کردیا اور پیکا ایکٹ نامنظور،صحافیوں پہ ظلم کے نعرے لگانا شروع کردیے اور اپوزیشن نے ایجنڈے کی کاپیاں پھاڑدیں۔

تاہم شور شرابے کےباوجود اسپیکر سردار ایاز صادق ایوان کی کارروائی جاری رکھی اور ایجنڈے پر موجود حکومتی قانون سازی کا عمل جاری رہا۔

واضح رہے کہ اجلاس میں اپوزیشن کے شور شرابے میں تجارتی تنظیمات ترمیمی بل 2021، درآمدات و برآمدات انضباط ترمیمی بل،قومی ادارہ برائے ٹیکنالوجی بل 2024، نیشنل ایکسیلنس انسٹیٹیوٹ بل 2024 منظور کرلیے۔

اجلاس سے چار بل مؤخر بھی ہوئے،قومی کمیشن برائے انسانی ترقی ترمیمی بل 2023، قومی کمیشن برائے انسانی ترقی ترمیمی بل 2023،این ایف سی ادارہ برائے انجینئرنگ و ٹیکنالوجی ملتان ترمیمی بل 2023،نیشنل اسکلز یونیورسٹی اسلام آباد ترمیمی بل 2023 اور وفاقی اردو یونیورسٹی برائے آرٹس،سائنس و ٹیکنالوجی اسلام آباد ترمیمی بل 2023 مؤخر ہوگیا۔