صد راور وزیر اعظم کا تعلیم کے بین الاقوامی دن کے موقع پر خصوصی پیغام

صدر مملکت آصف علی زرداری اور وزیر اعظم شہباز شریف نے تعلیم کے بین الاقوامی دن کے موقع پر خصوصی پیغام جاری کیے ہیں۔

صدر مملکت آصف علی زرداری نے عالمی یومِ تعلیم کے موقع پر پیغام دیتے ہوئے کہا کہ ’’مصنوعی ذہانت اور تعلیم: آٹومیشن کی دنیا میں انسانی ارادہ و اختیار کا تحفظ‘‘ کے عنوان کے تحت عالمی یومِ تعلیم منا رہے ہیں۔

آصف علی زرداری نے کہا کہ مصنوعی ذہانت کا ذمہ دارانہ استعمال تعلیمی نظام میں انقلاب برپا کرنے کی صلاحیت رکھتا ہے، مصنوعی ذہانت پر مبنی ٹولز سیکھنے کے عمل کو انفرادی ضروریات کے مطابق ڈھالنے میں مدد دے سکتے ہیں۔

صدر مملکت کا یہ بھی کہنا تھا کہ مصنوعی ذہانت کے ٹولز کی مدد سے تعلیمی نظام میں ڈیٹا پر مبنی اصلاحات لائی جا سکتی ہیں، مصنوعی ذہانت کی صلاحیتوں سے مستفید ہونے کے لیے  ہمیں تعلیمی انفراسٹرکچر پر سرمایہ کاری کو ترجیح دینا ہوگی۔

صدر مملکت نے کہا کہ تعلیم کو ایک خوشحال، ہمہ گیر اور ترقی پسند پاکستان کی بنیاد بنانے کے لیے مل کر کام کرنا ہوگا، مصنوعی ذہانت  کی دنیا میں انسانی ارادہ و اختیار، تخلیقی صلاحیت، تنقیدی سوچ  اور فیصلہ سازی کو مقدم رہنا چاہیے۔

آصف علی زرداری نے کہا کہ تعلیمی نظام کو درپیش دیگر مستقل چیلنجوں سے بھی نمٹنے کی ضرورت ہے ، ہمیں اپنے تعلیمی نظام میں بہتری لانے کے لیےمصنوعی ذہانت کا استعمال کرنا چاہیے۔