بندروں کے جھنڈ نے 10ویں جماعت کی طالبہ کو گھر کی چھت سے گراکر ہلاک کر دیا

پٹنہ : بھارتی ریاست بہار کےضلع سیوان میں بندروں کے جھنڈ نے دسویں جماعت کی طالبہ کو گھر کی چھت سے دھکا دے دیا جس کے نتیجے میں لڑکی ہلاک ہوگئی۔
بھارتی میڈیا رپورٹس کے مطابق حادثے کا یہ افسوسناک واقعہ بھگوان پور پولیس اسٹیشن کی حدود میں واقع مگھر گاؤں میں ہفتے کی دوپہر کو پیش آیا۔
دسویں جماعت کی طالبہ پریا کمار سرد موسم کے دوران دھوپ میں ٹہلتے ہوئے چھت پر پڑھ رہی تھی۔
میڈیا رپورٹس کے مطابق عینی شاہدین کا کہناہے کہ اس دوران کئی بندر چھت پر آئے اور لڑکی کو ہراساں کرنا شروع کر دیا، خوف کے باعث طالبہ مفلوج ہوگئی۔پریا بندروں سے خوفزدہ ہو کر اپنی جگہ سے ہل تک نہ سکی، تاہم جب گاؤں کے لوگوں نے اسے دیکھا تو وہ چیخنے لگے، جس سے پریا کو سیڑھیوں کی طرف بھاگنے کی ہمت ملی۔
اس دوران مبینہ طور پر ایک بندر نے چھلانگ لگائی اور اسے زور سے دھکا دیا، جس کے نتیجے میں وہ چھت سے گر گئی۔
میڈیا رپورٹ کے مطابق نیچے گرنے کی وجہ سے لڑکی کو شدید چوٹیں آئیں اور وہ بے ہوش ہوگئی، اسے بچانے کے لیے فوری طور پر سیوان صدر ہسپتال لے جایا گیا جہاں ڈاکٹروں نے متعدد زخموں کو وجہ قرار دیتے ہوئے طالبہ کی موت کی تصدیق کردی۔