امریکی صدر ڈونلڈ ٹرمپ کا اردن اور مصر سے بڑا مطالبہ

امریکی صدر ڈونلڈ ٹرمپ نے کہا ہے کہ وہ چاہتے ہیں کہ اردن اور مصر غزہ سے تعلق رکھنے والے زیادہ سے زیادہ پناہ گزینوں کو قبول کریں۔

اس کے ساتھ ساتھ انہوں نے 2 ہزارپونڈ وزنی بم اسرائیل کو دینے کا اعلان کرتے ہوئے کہا کہ اس حوالے سے سابق صدر جو بائیڈن کی جانب سے عائد کی گئی پابندی اٹھالی گئی ہے۔

اردن کے شاہ عبداللہ کو 26 جنوری کو فون کال کرنے کے بعد صحافیوں سے گفتگو کرتے ہوئے صدر ٹرمپ نے کہا کہ آج بم ریلیز کردیے گئے ہیں،اسرائیل کو طویل عرصے سے اس کا انتظارتھا، اسرائیل نے خریدے ہوئے ہیں۔

امریکی صدر نے کہا کہ اردن کے شاہ عبداللہ سے بات کی ہے اور مصر کے صدر عبدل فتح السیسی سے اتوار کو بات کرونگا، میں چاہتا ہوں کہ مصر غزہ کے پناہ گزینوں کو قبول کرے۔  آپ تقریبا 15 لاکھ لوگوں کے بارے میں بات کر رہے ہیں، ہم اس سارے معاملے کو صاف کررہے ہیں،آپ جانتے ہیں کہ سب ختم ہوگیا۔

انہوں نے بتایا کہ میں پوری غزہ پٹی کو دیکھ رہا ہوں،یہاں سب کچھ تباہ ہوگیا ہے، غزہ پٹی کے پناہ گزینوں کی نئی آبادکاری عارضی یا مستقل بھی ہوسکتی ہے۔ غزہ پٹی میں سب کچھ تباہ ہوچکا ہے اور لوگ مر رہے ہیں۔ کچھ عرب ممالک سے مل کرالگ جگہ ہاوسنگ کی تعمیر چاہتا ہوں۔

خیال رہے کہ اسرائیلی جارحیت کے نتیجے میں غزہ میں 47 ہزار سے زائد فلسطینی شہری شہید ہوئے جبکہ ہزاروں زخمی ہیں اور باقی افراد کو خوراک تک رسائی میں مشکلات کا سامنا ہے جبکہ دیگر مسائل الگ ہیں۔