سینیٹ سےپیکا ایکٹ کی منظوری کے بعد صحافیوں کے شہر شہر احتجاجی مظاہرے

لاہور:سینیٹ سے پیکا ایکٹ ترمیمی بل 2025 منظور ہونے کے بعد اوپوزیشن اور صحافتی تنظیموں کی جانب سے شدید احتجاج کیا جا رہا ہے۔
بل کی منظوری کے خلاف ایک طرف اپوزیشن کی جانب سے اس پر تنقید کی جارہی ہے تو دوسری جانب ملک بھر میں صحافی برادری اس ایکٹ کے خلاف سراپا احتجاج ہے۔
پاکستان کے سب سے بڑے شہر کراچی میں پاکستان فیڈرل یونین آف جرنلسٹس (پی ایف یو جے) نے پیکا ترمیمی ایکٹ کے خلاف احتجاجی مظاہرہ کیا جو کہ پریس کلب کے باہر منعقد کیا گیا، احتجاج میں صحافیوں کی بڑی تعداد نے شرکت کی، جبکہ مختلف صحافتی تنظیموں کے نمائندوں نے بھی اس میں اپنی موجودگی ظاہر کی۔
احتجاج سے خطاب کرتے ہوئے کراچی پریس کلب کے سابق صدرر امتیاز خان فاران نے کہا کہ پیکا ایکٹ کو جلد بازی کے ساتھ منظور کیا گیا،اپنے خطاب میں انہوںنے مزید کہا کہ ایک جانب ملک میں آزادی اظہار رائے کی بات کی جاتی ہے، لیکن اگر یہ قانون شفاف ہے تو پھر صحافتی تنظیموں سے مشاورت کیوں نہیں کی گئی؟
صوبائی دارالحکومت لاہور میں پریس کلب اور دیگر صحافتی تنظیموں کی جانب سے شدید احتجاج کیا گیا۔
پریس کلب کے باہر ہونے والے احتجاج میں پارلیمانی لیڈر پنجاب اسمبلی علی امتیاز وڑائچ، ڈائریکٹر نیوز ایسوسی ایشن کے عہدے دار، ینگ ڈاکٹرز ایسوسی ایشن کے نمائندے اور پنجاب ٹیچرز ایسوسی ایشن کے نمائندے بھی شریک ہوئے،اس دوران صحافیوں نے ہاتھوں میں کالے جھنڈے اٹھا رکھے تھے اور اپنے بازو پر کالی پٹیاں باندھ کر احتجاج کیا۔
صحافیوں نے اس قانون کو آزادی اظہار رائے کے خلاف قرار دیا اور اس کے خلاف اپنی آواز بلند کی۔
پیکا ایکٹ کی منظوری کے خلاف وفاقی دارالحکومت اسلام آبادمیں پریس کلب کے باہر صحافیوں کی جانب سےشدید احتجاج کیا گیا، صحافی برادری کی بڑی تعداد اسلام آباد پریس کلب کے باہر پہنچی اور بل کی منظوری کے خلاف نعرے بازی کی۔
 صحافیوں نےپریس کلب اسلام آباد سے مین روڈ تک مارچ بھی کیا اور احتجاجی پینا فلیکس بھی آویزاں کیے گئے۔ مختلف تنظیموں کے صدور بھی احتجاج میں شریک ہوئے۔