بنوں:سیکیورٹی فورسز کی کامیاب کارروائی میں 3 خارجی دہشتگرد ہلاک، 9 زخمی

راولپنڈی:سیکیورٹی فورسز نے بنوں کے علاقے جانی خیل میں کامیاب کارروائی کرتے ہوئے3 خارجی دہشتگردوں کو ہلاک جبکہ9 کو زخمی کردیا۔
پاک فوج کے شعبہ تعلقاتِ عامہ( آئی ایس پی آر) کے مطابق 27 جنوری کو سیکورٹی فورسز نے ضلع بنوں کے علاقے جانی خیل میںدہشتگردوں کی موجودگی کی بنا پر کارروائی کی،ترجمان کے مطابق یہ کارروائی خفیہ معلومات کی بنیاد پر کی گئی۔
ترجمان آئی ایس پی آر بیان کے مطابق آپریشن کے دوران، سیکورٹی فورسز نے دہشتگردوں کے ٹھکانے کو مؤثر طریقے سے نشانہ بنایا، جس کے نتیجے میں 3 دہشتگرد ہلاک جب کہ 9 زخمی ہوئے۔
آئی ایس پی آر کے مطابق ہلاک خوارج کے قبضے سے اسلحہ اور گولہ بارود بھی برآمد ہوا، ہلاک خوارج سکیورٹی فورسز کے خلاف دہشت گردی کی کارروائیوں اور شہریوں کے قتل میں بھی ملوث تھے۔
ترجمان کی جانب سے جاری بیان میں مزید کہا گیاکہ علاقے میں مزید دہشتگردوں کی موجودگی کے خاتمے کے لیےسیکیورٹی فورسزکا  کلیئرنس آپریشن جاری ہے۔
ترجمان نے مزید کہا کہ پاکستان کی سیکورٹی فورسز دہشتگردی کے خاتمے کے لیے پرعزم ہیں، ملک کو اس لعنت سے پاک کرنے کے لیے اپنی جدوجہد جاری رکھیں گی۔