شمالی وزیرستان :سیکیورٹی فورسز کی کارروائی میں  6 خارجی دہشتگرد ہلاک ، میجر سمیت 2 جوان شہید

راولپنڈی :شمالی وزیرستان میں سکیورٹی فورسز کی کارروائی کے دوران 6 خارجی دہشتگرد ہلاک اور میجر سمیت 2 جوان شہید ہو گئے۔
پاک فوج کے شعبہ تعلقات عامہ (آئی ایس پی آر) کے مطابق سکیورٹی فورسز نے شمالی وزیرستان کے علاقے میر علی میں خفیہ اطلاع کی بنیاد پر آپریشن کیا،جس کے دوران سیکیورٹی اہلکاروں نے خوارج کے ٹھکانوں کو مؤثر طریقے سے نشانہ بنایا تاہم اس آپریشن کے دوران دوران 6 خوارج مارے گئے۔
ترجمان آئی ایس پی آر کے مطابق خوارج سے شدید فائرنگ کے تبادلے میں پاک فوج کے 2 جوان بہادری سے لڑتے ہوئے شہید ہوئے
، شہید ہونے والوں میں میجر حمزہ اسرار اور سپاہی محمد نعیم شامل ہیں ، میجر حمزہ کا تعلق راولپنڈی سے جبکہ سپاہی محمد نعیم کا تعلق نصیر آباد سے ہے۔ 
ترجمان پاک فوج کا کہنا ہے کہ علاقے میں خارجیوں کے خاتمے کے لیے آپریشن جاری ہے ،سیکیورٹی فورسزپاکستان سے دہشتگردی کو ختم کرنے کے لیے پرعزم ہیں، اور بہادر جوانوں کی یہ قربانیاں ہمارے عزم کو مزید تقویت دیتی ہیں۔