آئی سی سی چیمپئنز ٹرافی کی افتتاحی تقریب کہاں ہو گی؟ فیصلہ ہو گیا

لاہور: انٹرنیشنل کرکٹ کونسل (آئی سی سی)کی جانب سے چیمپئنز ٹرافی کی افتتاحی تقریب لاہور میں کرانے کا فیصلہ کیا گیاہے۔
اسپورٹس ذرائع کے مطابق آئی سی سی چیمپئنز ٹرافی کی افتتاحی تقریب لاہور میں کرانے کا فیصلہ کیا گیا ہے،افتتاحی تقریب 16 فروری کو حضوری باغ لاہور میں منعقد کی جائےگی ۔
اس حوالے سے پاکستان کرکٹ بورڈ (پی سی بی) کی جانب سے  چیمپئنز ٹرافی کی افتتاحی تقریبات کا شیڈول تیار کر لیا گیا ہے ۔ اور چیئرمین پی سی بی محسن نقوی نے تمام تقریبات کی حتمی منظوری بھی دے دی ہے۔
قذافی سٹیڈیم لاہور میں جاری تعمیراتی کام بھی تکمیل کے قریب ہے۔ اور قذافی سٹیڈیم کی افتتاحی تقریب 7 فروری کو کیے جانے کا امکان ہے، وزیر اعظم شہباز شریف قذافی اسٹیڈیم کی افتتاحی تقریب میں مہمان خصوصی ہوں گے۔
 چیئرمین پی سی بی محسن نقوی نے وزیر اعظم شہباز شریف کو دعوت دے دی ہے، اور اسٹیڈیم کی افتتاحی تقریب میں لیزر شو بھی کیے جانے کا امکان ہے۔
ذرائع کے مطابق پی سی بی نے نیشنل سٹیڈیم کراچی کی نئی بلڈنگ کا افتتاح کرنے کا بھی فیصلہ کیا ہے ، نیشنل سٹیڈیم کراچی کی افتتاحی تقریب 11 فروری کو ہو گی،صدر آصف علی زرداری کی بطور مہمان خصوصی تقریب میں شرکت متوقع ہے۔
خیال رہے کہ آئی سی سی چیمپئنز ٹرافی کا افتتاحی میچ 19 فروری سے 9 مارچ تک شیڈول ہے،ٹورنامنٹ ہائبرڈ ماڈل کے تحت پاکستان اور متحدہ عرب امارات (یو اے ای) میں کھیلا جائے گا،جبکہ ٹورنامنٹ کا افتتاحی میچ 19فروری کوپاکستان اور نیوزی لینڈ کے درمیان کراچی میں شیڈول ہے۔ اور یہ میچز ٹین اسپورٹس پر براہ راست نشر کیے جائیں گے۔