لاہور: وکلا کےمبینہ تشدد سے پولیس اہلکار جاں بحق

لاہور میں وکلا کے مبینہ تشدد سے پولیس کے اسسٹنٹ سب انسپکٹر (اے ایس آئی) جاں بحق ہوگئے۔
تفصیلات کے مطابق یہ واقعہ لاہور میں مزنگ کے علاقے میں پیش آیا جہاں وکلا نے مبینہ طور پر اے ایس آئی پر تشدد کیا۔
پولیس ذرائع کے مطابق پولیس اہلکاروں نے چیک ڈس آنر کیس میں مطلوب اشتہاری ملزم کی گرفتاری کے لیے کارروائی کی تھی کہ اس دوران وکلا نے دھاوا بول دیا۔
 پولیس حکام کا کہنا ہے کہ تشدد کے باعث اے ایس آئی شاہد کی حالت غیر ہو گئی، انہیں اسپتال پہنچایا گیا جہاں پہنچ کر انہوں نے دم توڑ دیا۔ پولیس حکام کے مطابق شواہد اکٹھے کر کے ملزمان کی تلاش شروع کر دی گئی ہے۔
 دوسری جانب آئی جی پنجاب ڈاکٹر عثمان انور نے واقعے کا نوٹس لیتے ہوئے ملزمان کی فوری گرفتاری اور ان کے خلاف سخت قانونی کارروائی کرنے کا حکم دے دیا۔