میاں اسلم اقبال کے ڈیرے سے لاش ملنے کا معمہ حل ہو گیا،قاتل گرفتار

لاہور:پاکستان تحریک انصاف کے روپوش رہنما اور سابق صوبائی وزیر میاں اسلم اقبال کے ڈیرےسےلاش ملنےکا معمہ حل کرلیاگیا۔
پولیس کے مطابق میاں اسلم اقبال کے ڈیرے سے ملنے والی لاش کی شناخت ہوگئی ہے، مقتول کی شناخت عمران کے نام سے ہوئی جو فیصل آباد کا رہائشی اور برخاست شدہ پولیس اہلکار ہے۔
پولیس حکام کا کہنا ہے کہ کانسٹیبل ارشد اور عمران نشے میں تھے، دونوں میں جھگڑا ہوا۔
 جس کے بعد آرگنائزڈ کرائم یونٹ کےاہلکار ارشد نےاپنےدوست عمران کو فائرنگ کرکے قتل کیا اور پستول نہرمیں پھینک کرفرارہوگیا ۔
جس کو بعدازاں پولیس نے کارروائی کرتے ہوئے میانوالی سے گرفتار کرلیا۔
پولیس کا مزید کہنا ہے کہ ملزم ارشد نے میاں اسلم کے ڈیرے پر کوارٹر کرائے پر لیا تھا جب کہ فلیٹ سے آئس نامی نشے کا سامان بھی برآمد ہوا تھا۔
گرفتارملزم ارشد نےدوران تفتیش اعتراف جرم کرلیا،قتل کی حتمی وجوہات سامنے لانےکیلئے تفتیش جاری ہے۔
خیال رہے کہ گزشتہ روز سابق صوبائی وزیر میاں اسلم اقبال کے ڈیرے  کے ایک کمرے سے تقریباً 40 سالہ شخص کی بوسیدہ حالت میں لاش ملی  تھی جس پر پولیس نے مقدمہ بھی درج کرلیا تھا۔