ماہ رمضان کے باعث سندھ بھرمیں میٹرک امتحانات کی تاریخ تبدیل کردی گئی

کراچی:ماہ رمضان کے باعث سندھ بھر میںمتحانات کی تاریخ تبدیل کر دی گئیں۔
نئے شیڈول کے مطابق سندھ میں نویں اور دسویں جماعت کے امتحانات 7 اپریل سے شروع ہوں گے، جبکہ گیارہویں اور بارہویں جماعت کے امتحانات کا آغاز 28 مئی سے ہوگا۔
اس کے علاوہ صوبائی حکومت نے صوبے میں اساتذہ کی بھرتی کا مرحلہ 30 جون تک بڑھانے کا فیصلہ کیا گیا ہے،صوبائی وزیر تعلیم کی زیر صدارت اجلاس میں 5 ہزار مسلسل غیرحاضر اساتذہ کو برطرف کرنے کی ہدایت کی گئی ہے۔
واضح رہے کہ 22 فروری کو صوبہ سندھ میں میٹرک امتحانات کے شیڈول میں ردوبدل کا فیصلہ کرلیا گیا تھا، مارچ میں شیڈول امتحانات کو رمضان المبارک اور عیدالفطر کے بعد لینے کا فیصلہ کیا گیا تھا۔
خیال رہے کہ اس سے قبل خیبرپختونخوا حکومت نے بھی رمضان المبارک کے پیش نظر میٹرک اور انٹر کے سالانہ امتحانات ملتوی کر دیے تھے۔
صوبائی حکومت نے تمام تعلیمی بورڈز کو میٹرک کے امتحانات ملتوی کرنے کا حکم دیتے ہوئے یہ امتحانات رمضان کے بعد اپریل میں لینے کی ہدایات جاری کی ہیں۔
اس حوالے سے ترجمان پشاور تعلیمی بورڈ کا کہنا ہے کہ امتحانات ماہ رمضان کے بعد لیے جائیں گے،امتحانات ملتوی کرنے کا مقصد رمضان کے دوران طلباء کو سہولت دینا ہے۔
صوبے میں میٹرک کے سالانہ امتحانات 5 مارچ کو شیڈول تھے تاہم اب التوا کے بعد میٹرک کے سالانہ امتحانات 8 اپریل کو شروع ہوں گے،خیبرپختونخوا میں انٹر کے امتحانات اب 10 اپریل کے بجائے 7 مئی کو شروع ہوں گے۔