متحدہ عرب امارات نے کتنے ہزار پاکستانیوں کو ملک بدرکیا؟تفصیلات سامنے آ گئیں

دبئی: خلیجی ممالک کی جانب سے پاکستانی شہریوں کے خلاف کریک ڈاؤن جاری ہے ،متحدہ عرب امارات نے اس سلسلے میں سب سے زیادہ پاکستانیوں کو ملک بدر کیا۔
تفصیلات کے مطابق متحدہ عرب امارات حکومت کی جانب سے گزشتہ 16 ماہ کے دوران 10 ہزار 100 سے زائد پاکستانیوں کی ملک بدری اور 2024ء میں 50 ہزار سے زائد پاکستانیوں کی ویزہ درخواستیں مسترد کیے جانے کا انکشاف ہوا ہے۔
وزارت خارجہ کے ذرائع کے مطابق متحدہ عرب امارات سے ستمبر 2023ء سے جنوری 2025ء تک ملک بدر کیے گئے پاکستانی کے اعداد و شمار سامنے آگئے، عرب امارات سے گزشتہ 16 مہینوں میں 10 ہزار 100 سے زائد پاکستانیوں کو ملک بدر کیا گیا۔
 ذرائع کے مطابق ستمبر 2023ء سے جنوری 2025ء تک 4 ہزار 740 سزا یافتہ پاکستانی قیدیوں کو ملک بدر کیا گیا، یہ پاکستانی شہری متحدہ عرب امارات کی مختلف جیلوں میں سزا کاٹ چکے ہیں، اس دورانیے میں 5800 دیگر پاکستانی شہریوں کو مختلف جرائم کی بنیاد پر ملک بدر کیا گیا۔ 
ذرائع وزارت خارجہ نے مزید بتایا کہ متحدہ عرب امارات نے سال 2024ء میں 50 ہزار سے زائد پاکستانی شہریوں کی ویزا درخواستیں مسترد کیں۔