بھارت کی دہشتگردوں کومالی معاونت کا معاملہ عالمی سطح پراُٹھائیں گے : وزیرخارجہ

جی این این کے مطابق وزیر خارجہ مخدوم شاہ محمود قریشی نے بھارت سرکارکے منفی عزائم اورعلاقائی سلامتی کودرپیش خطرات ‏کے حوالے سے ایک بیان میں کہا ہے کہ بھارت کی مقبوضہ کشمیر پالیسی بری طرح ناکام ہوئی، کشمیری قیادت، بھارت سرکار سے نالاں دکھائی دے رہی ہے ۔ کشمیری رہنماؤں نے مودی سے ملاقات میں 5 اگست 2019 کے یکطرفہ اورغیرآئینی ‏اقدامات پرنظرثانی کا مطالبہ کیا ہے ۔

انہوں نے کہاکہ بھارت اپنے اندرونی معاملات سے توجہ ہٹانے کیلئے اس قسم کے ناٹک رچاتا ہے، بھارت معاشی مشکلات سے دوچار ہے، بیروزگاری بڑھی ہے، بی جے پی سرکارکی کرونا وبا کےخلاف ناکام حکمت عملی کے باعث ہزاروں لوگ موت ‏کے منہ میں چلے گئے۔وزیرخارجہ  نے کہا کہ ہم افغان مہاجرین کی باعزت وطن واپسی کے خواہشمند ہیں ،  اب وقت آگیا ہے کہ وہ اپنے گھروں کو لوٹیں، اس مقصد کیلئے ہمیں عالمی برادری کی مدد درکارہوگی، شاہ محمود قریشی‎ ‎ نے مزید کہاکہ افغان مہاجرین کی وطن واپسی کیلئے، ایک مقررہ مدت اورجامعیت کا حامل منصوبہ ‏تشکیل دیا جانا چاہیئے ، اس منصوبے کوافغان امن عمل کا حصہ بنایا جانا چاہیے۔

انہوں نے مزید کہاکہ ہمیں اپنے شہروں اور شہریوں کو محفوظ بنانا کےلیے اس منصوبےپرسنجیدگی سے ‏سوچنا ہوگا، پاکستان خطے میں تعمیروترقی کے دوردورہ کا خواہشمند ہے ، پاکستان علاقائی روابط کا فروغ چاہتا ہے تاکہ ملک میں سرمایہ کاری آئے۔ وزیرخارجہ نے کہاکہ افغانستان میں بدامنی پھیلا کرپاکستان کوصورتحال میں الجھانے کی منفی سوچ عالمی ‏مقاصد کے منافی ہوگی، دنیا کو اس صورت حال کا نوٹس لینا چاہیے۔