پاکستان سمیت دنیا بھر میں آج ہندو برادری کا تہوار’’ہولی‘‘ دھوم دھام سے منا رہا ہے

لاہور:پاکستان سمیت دنیا بھر میں آج ہندو برادری کا تہوار ’’ہولی ‘‘ دھوم دھام سے منایا جا رہا ہے۔
ہولی کو رنگوں کا تہوار بھی کہا جاتا ہے جو کہ ہندوؤں کا مذہبی تہوار ہے۔
’’ہولی ‘‘بہار کے موسم کی آمد پر منائے جانے والا ہندوؤں کا مذہبی تہوار ہے،ہولی کی تقریبات دو دن چلتی ہیں، پہلے دن مختلف رسومات ادا ہوتی ہیں اور دوسرے دن رنگ بکھیرے جاتے ہیں، بچے اور بڑے ایک دوسرے پر رنگ پھینکتے ہیں۔
 پاکستان بھر بالخصوص صوبہ سندھ کے علاقوں مٹھی، حیدرآباد، جیکب آباد، تھرپارکر میں ہولی کی تقریب میں ہندوؤں کیساتھ مسلم برادری کے افراد شرکت کر کے رواداری اور مذہبی ہم آہنگی کا اظہار کرتے ہیں۔

 ہولی کے تہوار کے موقع پر وزیر اعظم شہباز شریف نے اپنے پیغام میں کہا ہے کہ میں پاکستان بھر میں ہندو برادری کو ہولی کے پرمسرت موقع پر دلی مبارکباد پیش کرتا ہوں، یہ تہوار جو بہار کی آمد کا اعلان ، محبت اور اچھائی کی فتح کی علامت ہے، ایک متحرک توانائی کا احساس دلاتا ہے۔
وزیر اعظم شہباز شریف مزید کہا کہ نئی شروعات اور تجدید تعلقات کی مضبوطی کا جشن مناتے ہوئے یہ دن ایک مضبوط، زیادہ متحد قوم کی تعمیر کی اہمیت اور تمام شہریوں کی شمولیت کو اجاگر کرتا ہے، رنگوں کا یہ تہوار آپ کی زندگیوں کو خوشیوں، صحت کی کامیابیوں اور خوشحالی سے بھر دے۔ 
اس کے علاوہ صوبائی حکومت سندھ کی جانب سے بھی ہندوؤں کو ان کے مذہبی تہوار پر مبارکباد دیتے ہوئے مذہبی ہم آہنگی کا اظہار کیا گیا،اس موقع پر صوبائی حکومت نے سرکاری ملازمین کے لیے دو روز کی عام تعطیل کا اعلان بھی کیا ہے تا کہ ملازمین اپنا مذہبی تہوار خاندان کے ساتھ بھرپور جوش و خروش سے منا سکیں۔