جعفر ایکسپریس پر ایک سیاسی جماعت کے سوشل میڈیا نے وہی پراپیگنڈا کیا جو انڈین میڈیانے کیا،راناثنااللہ 

فیصل آباد:  وزیر اعظم کے مشیر رانا ثنا اللہ نے کہا کہ سانحہ جعفر ایکسپریس پرایک سیاسی جماعت نے وہی پروپیگنڈا کیا جوبھارتی میڈیا کر رہا تھا ۔
فیصل آباد میں میڈیا سے گفتگو کرتے ہوئے رانا ثنااللہ کا کہنا تھا کہ کوئی شک نہیں پاکستان میں دہشتگردی میں بھارتی خفیہ ایجنسی ’را‘ کا ہاتھ ہے،  بھارتی ایجنسی دہشت گردوں کی ماں کا کردار ادا کررہی ہے، سفاکانہ کارروائیوں کیلئے فنڈز اور اسلحہ فراہم کررہی ہے، جبکہ بھارتی خفیہ ایجنسی دہشت گردوں کو فنڈنگ اور اسلحہ بھی فراہم کر رہی ہے۔ 
وزیراعظم کے مشیرکا کہنا تھا کہ بڑے افسوس کی بات ہے کہ ہمارا ہمسایہ افغانستان جس کی پناہ گزینوں کی شکل میں ہم نے سالہاسال مدد کی ہے، افغانستان کے عوام پاکستان کے ساتھ ہیں، مگر افغان حکومت پروکسی کا کردار ادا کررہی ہے، دہشتگردوں کو جس قسم کی سہولت فراہم کی ہوئی ہیں، ان کی مدد سے وہ دہشتگردی کی کارروائیاں کرتے ہیں جوکہ انتہائی قابل مذمت ہے۔
انہوں نے کہا کہ دہشتگرد افغانستان میں تیاری کر کے پھر پاکستان میں کارروائی کرتے ہیں۔ دہشت گردی کے واقعے کے ساتھ ہی بھارتی میڈیا نے پراپیگنڈا شروع کر دیا۔ اور اس پروپیگنڈے سے معلوم ہوتا ہے کہ بھارت کو پہلے سے واقعہ کا علم تھا۔
انہوں نے کہا کہ ایک سیاسی جماعت کے سوشل میڈیا نے وہی پراپیگنڈا کیا جو انڈین میڈیا کررہا تھا، پوری قوم کو اپنے شہداء اور غازیوں کے ساتھ کھڑے ہونا چاہیے۔
مشیر داخلہ کا کہنا تھا کہ ہماری فورسز نے جیسے ہی آپریشن شروع کیا، تمام دہشتگردوں کو چند گھنٹوں میں جہنم واصل کردیا گیا، اب جائے وقوعہ پر سب کی رسائی ہے، آزاد میڈیا بھی وہاں گیا ہے، سب نے دیکھا ہے کہ ٹرین کے تمام مسافر بازیاب ہوچکے ہیں جبکہ 26 لوگ شہید ہوئے ہیں جن میں 18 جوان پاک فوج سے ہیں۔
انہوں نے کہا کہ دہشت گردی کے خلاف پوری دنیا متفق ہے۔ اور پوری قوم کو متحد ہونے کی ضرورت ہے۔ پوری قوم کو اپنے شہدا اور غازیوں کے ساتھ کھڑا ہونا چاہیے۔ اور متحد ہو کر ہی دہشت گردی کا مقابلہ کیا جا سکتا ہے۔
رانا ثنا اللہ نے کہا کہ بلوچستان میں گرینڈ آپریشن کی صرف باتیں ہیں۔ اور بلوچستان میں گرینڈ آپریشن کی کوئی ضرورت نہیں۔ تاہم بلوچستان میں سیکیورٹی فورسز کے انٹیلی جنس آپریشن جاری ہیں۔ اور روزانہ کی بنیاد پر سینکڑوں انٹیلی جنس بیسڈ آپریشن کیے جا رہے ہیں۔