ڈہرکی :رکن سندھ اسمبلی جام مہتاب کی گاڑی پر فائرنگ، ڈرائیور اور ایک سکیورٹی گارڈ جاں بحق

ڈہرکی کے قریب پاکستان پیپلز پارٹی کے رکن سندھ اسمبلی جام مہتاب حسین ڈہر کے قافلے پر فائرنگ سے ان کا ڈرائیور اور ایک سکیورٹی گارڈ جاں بحق اور 2 زخمی ہوگئے، حملے میں جام مہتاب حسین ڈہر محفوظ رہے۔
تفصیلات کے مطابق فائرنگ کا واقعہ ضلع گھوٹکی کی تحصیل ڈہرکی کے قریب کھینجو میں پیش آیا جس کے نتیجے میں گارڈ ظفر ڈہر جاں بحق ہوگیا، زخمیوں میں ڈرائیور اختر پٹھان، قریبی دوست سید اسد شاہ شامل ہیں جنہوں تشویشناک حالت میں رحیم یار خان ریفر کردیا گیا۔
ڈی ایس پی گھوٹکی کے مطابق فائرنگ کی اطلاع  پر پولیس کی بھاری نفری کو طلب کیا گیا،  فائرنگ کے بعد حملہ آور فرار ہوگئے۔ حملے میں جام مہتاب کا ڈرائیور، ایک گارڈ جاں بحق اور 2 زخمی ہوئے جب کہ جام مہتاب محفوظ رہے۔
دوسری جانب وزیراعلیٰ سندھ سید مراد علی شاہ نے واقعے کا سختی سے نوٹس لیتے ہوئے آئی جی سندھ کو ملزمان کی فوری گرفتاری کی ہدایت کی ہے۔
وزیراعلیٰ کے ترجمان کے مطابق مراد علی شاہ نے فائرنگ کے واقعے کی شدید مذمت کرتے ہوئے زخمیوں کی جلد صحت یابی کی دعا بھی کی ہے۔