مسافروں کے ممکنہ رش کے پیش نظر ریلوے حکام کا عیدالفطر پر  5 خصوصی ٹرینیں چلانے کا اعلان

لاہور: پاکستان ریلوے نے عید الفطر کے موقع پرمسافروں کی سہولت کے لیے 5 ا سپیشل ٹرینیں چلانے کا فیصلہ کیا ہے۔
اس حوالے سے پاکستان ریلوے کی جانب سے ان ٹرینوں کا شیڈول جاری کر دیا گیا ہے۔
جاری کر دہ شیڈول کے مطابق 3 سپیشل ٹرینیں لاہور اور کراچی کے مابین چلائی جائیں گی۔ایک ٹرین کوئٹہ سے پشاور جبکہ ایک ٹرین کراچی سے راولپنڈی کے مابین چلائی جائے گی۔
کوئٹہ سے پشاور کی ٹرین سکیورٹی اداروں کی اجازت ملنے کے بعد آپریٹ کی جائے گی۔
پہلی عید سپیشل لاہور سے کراچی کے درمیان چلائی جائے گی،دوسری عید سپیشل راولپنڈی سے کراچی کے درمیان چلے گی،تیسری عید سپیشل کوئٹہ سے پشاور کے درمیان چلائی جائے گی۔
جاری شیڈول کے مطابق چوتھی سپیشل ٹرین عید کے تیسرے روز کراچی سے لاہور کے لیے چلائی جائے گی۔
اس حوالے سےریلوے ہیڈکوارٹر نے لاہور، ملتان، راولپنڈی، سکھر، کراچی، پشاور، اور کوئٹہ ڈویژن کے افسران کو ان ٹرینوں کے آپریشن کے حوالے سے ہدایات جاری کر دی ہیں۔
مسافروں کا کہنا ہے کہ ہر پردیسی کی خواہش ہوتی ہے کہ عید کا تہوار اپنے پیاروں کے ساتھ گزارے مگر رش اس قدر ہوتا ہے کہ آبائی علاقوں میں جانا وبال جان بن جاتا ہے ۔
 ریلوے کی جانب سے عید سپیشل چلانا خوش آئند ہے ، اس سے مسافروں کو ریلیف ملے گا ،ریلوے ذرائع کے مطابق عید پر رش کے پیش نظر پہلے سے چلنے والی ٹرینوں کے ساتھ اضافی کوچز بھی لگانے پر غور کیا جارہا ہے ۔