صدر و وزیر اعظم کی 16 دہشتگردوں کو ہلاک کرنے پر سکیورٹی فورسز کی تعریف

صدر آصف علی زرداری اور وزیراعظم محمد شہباز شریف نے شمالی وزیرستان کے علاقے غلام خان کلے میں 16 خارجی دہشتگردوں کو ہلاک کرنے پر سکیورٹی فورسز کو خراج تحسین پیش کیا ہے۔

صدر مملکت نے کہا ہے کہ پاکستان کی بہادر افواج ملکی سرحدوں کی ہمہ وقت حفاظت کیلئے پرعزم ہیں، دہشت گردی کے عفریت کے مکمل خاتمے تک دہشتگردوں کے خلاف کاروائیاں جاری رہیں گی۔

دونوں رہنماوں نے  افغان سرحد کے ذریعے پاکستان میں در اندازی کی کوشش ناکام بنانے اور تمام 16 خارجیوں کو جہنم واصل کرنے پر سکیورٹی فورسز کے افسران و جوانوں کی پیشہ ورانہ صلاحیتوں کی تعریف کی ہے۔

وزیراعظم نے اپنے بیان میں کہا ہے کہ دہشتگردوں کے ناپاک عزائم کو کبھی کامیاب نہیں ہونے دیں گے، مجھ سمیت پوری قوم اپنی بہادر افواج پاکستان کے شانہ بشانہ کھڑی ہے۔