عدالتی احکامات کی خلاف ورزی پر عید کے بعد توہین عدالت کی پٹیشن دائر کریں گے،سلمان اکرام راجہ

اسلام آباد: پاکستان تحریک انصاف (پی ٹی آئی) کے سیکرٹری جنرل سلمان اکرم راجہ نے کہا ہے کہ عدالتی احکامات کی خلاف ورزی پر عید کے بعد توہین عدالت کی پٹیشن دائر کریں گے۔
اسلام آباد می میڈیا سے گفتگو کرتے ہوئے سلمان اکرم راجہ نے کہا کہ میں بانی پی ٹی آئی سے ملا تو وہ تمام باتوں سے واقف تھے۔ اور انہوں نے مجھے کہا کہ میں نے جو کیا وہ ٹھیک کیا۔
انہوں نے کہا کہ ثابت ہو گیا کہ عدالتی احکامات کی کوئی اہمیت نہیں ہے۔ ہم عید کے بعد توہین عدالت کی پٹیشن دائر کریں گے۔
سلمان اکرم راجہ نے کہا کہ پریس کانفرنسیں نہیں بلکہ بانی پی ٹی آئی سے ملاقاتیں اہم ہیں۔ میرے حوالے سے جو کچھ بھی کہا جا رہا ہے وہ غیر اہم ہے ،ان کا کہنا تھا کہ میرے خلاف وہ لوگ باتیں کر رہے ہیں جن کا پارٹی میں پہلے بھی کوئی عمل دخل نہیں تھا۔
سلمان اکرم راجہ نےمزید کہا کہ ہم نہیں چاہتے کہ سڑکوں پر آئیں لیکن اگر ہمیں مجبور کیا گیا تو سڑکوں پر آنا پڑے گا۔
میڈیا سے گفتگو میں ان کا کہنا تھا کہ اتحادیوں سے بھی مشاورت ہو رہی ہے۔ اور وقت کے ساتھ سب کچھ ہو گا ،جو بھی مولانا فضل الرحمان کے خلاف بات کرتا ہے وہ بانی پی ٹی آئی کے مشن کو نقصان پہنچا رہا ہے۔
انہوں نے مزید کہا کہ میں پارٹی سے کسی کو بھی نہیں نکالتا بلکہ یہ فیصلے بانی پی ٹی آئی خود کرتے ہیں۔